NAHIMUOT ko sa komentaryo niining usa ka higala sa Facebook nga niingon nga kining nahitabo sa miaging Biyernes matawag og “PDP Na Pud.”
Daghan ang mahimong kahulogan sama sa pag-apil sa grupong Bisaya Na Pud sa pag-organisa sa maong dakong kalihokan sa PDP-Laban. Gani, ang t-shirt nga gipang-apod-apod puti man ug dunay tatak sa PDP-Laban ug Bisaya Na Pud.
Kay kitang mga Sugboanon mahilig man mopamubo sa atong mga pulong, ato ning matawag nga PDP Na Pud.
Dayon kay kasagaran sa mga nangapil sa nanghurar sa PDP-Laban nagbalhin-balhin na sab og partido. Mao nga human sa Lakas dayon LP, karon PDP Na Pud.
Ambot, di man unta ni mao ang kausaban nga gisaad ni Presidente Rodrigo Duterte sa panahon sa kampanya. Ang lapad nga kalihokang masa nga nisuporta kang Digong panahon sa 2016 elections di magpabayad ug dili magpahakot.
Apan unsaon ta man, mao may giduso sa iyang Presidential Assistant for Visayas.
Hinuon, di man ulahi ang tanan aron lang maduso ang development agenda ni Digong ug ang pederalismo.
Tan-awon nato sa umaabot nga mga kampanya kabahin sa revgov ug ang federalismo.
Ang Kilusang Pagbabago, sa iyang bahin, mopadayon sa ilang programa nga gitawag og “Biyaya Ng Pagbabago.”
PDP Council
Mahimong ikumpirmar kini maong impormasyon sa atong mga kauban sa media kabahin sa PDP-Laban sa Syudad sa Sugbo.
Apan unsa ka tinuod nga sa pagkakaron, wala pay natukod nga Council ang PDP-Laban dinhi sa atua kay pulos pa man sila mga probationary members kadtong bag-ong nagpasakop sa miaging Biyernes?
Sa atong nasayran, gikinahanglan pang moagi og mga Basic Membership Seminar (BMS) ang mga sakop sa PDP-Laban dinhi sa Syudad sa Sugbo usa pa matukod ang PDP-Laban Council.
Bisan pa man, atong nasayran sab nga gikinahanglang maplantsa kini sa dili pa mahitabo ang PDP-Laban national convention sa sunod tuig.
Pederalismo
Atong pangagpas nga kining mga problema nga namugna tungod sa ahat nga pagsalida sa PDP Na Pud sa miaging Biyernes masulbad na karong umaabot nga kampanya alang sa pederalismo.
Anhi nato masayran kon si kinsay kusog nga moduso niining mahinungdanong kausaban sa atong sistema sa politika nga giduso ni Presidente Duterte bisan pa kaniadtong wala pa siya modesisyon nga modagan alang sa pagka presidente. (@anol_cebu sa Twitter)