NAKABASA na ba mo aning mga linguwahe karon nga gigamit sa mga batan-on o millennials sa social media? Sama aning lodi (idol), petmalu, (malupit), werpa (power) ug uban pa. Pero dugay naman ni nga gigamit ang maong mga pulong sa mga Lesbian, Gay, Bi-sexual Transgender (LGBT) community ug kining mga kanto words.
Kon dili ka sakop aning maong mga grupo dili gyud ka makasabot sa mga lingguwahe nga ilang gigamit. Kasagaran gibali lang ang mga pulong. Sama sa matsalam (salamat), ikal (laki), ebay (private part sa babaye), yoti (sex), shudi avash (ayaw’g saba), yosi (sigarilyo), sampa (sandig), pangkat (gropo), pakals (kaon), way wawarts (walay kuwarta), bunal (private part sa lalaki), bato (shabu) ug daghan pang uban nga mga linguwahe sa mga LGBT ug mga bugoy.
Kitang medyo edad-edaran na, mosugot kita o di, masagop ug mogamit na gyud aning maong mga pulong. Dili lang ang tawo adunay evolution kon dili apil na usab ang pinulungan. Sama ani gong Bisaya, dili na karon ang lunsay’ng Binisaya ang atong gipanggamit kon dili aduna nay bag-ong mga pulong ang atong gisagop. Kay ang mga batan-on karon dili na makasabot anang mga linguwahe nga lawum kaayong mga Binisaya. Sama sa talikala, talad kan-anan (dinning table), naghiguwaos ug uban pa.
Duna man gani sugyot unta ang mga sakop sa Lubas sa Dagang Bisaya (Ludabi) kaniadto nga mosagop og mas lawum pa nga mga pulong. Ang radyo ila untang ilisan ngadto sa ‘kahunog’ (kahon nga motingog). Ang electric fan ilisan unta og ‘hangtok’ (hangin nga nagtuyok). Ang bra ila untang ilisan ug ‘panaptoy’ (panapton tabun sa totoy) ug panty ila untang ilisan ug ‘panaplat’ (panapton tabun sa b...l..t) ug ang brief ila untang ilisan ngadto sa ‘panaptin’ (panapton tabun sa o...n). Di na unta ta makasabot.
Ang nakanindot aning linguwaheng Bisaya kay ang usa ka English word daghan og hubad sa Binisaya. Sama anang ‘fall’ sa eninglis. Ang hubad ana sa Bisaya, hagbong, sukarap, sukamod, natumba, nadapa, namumu, nalintuwad. Mao nang mosagop ta aning maong mga matang sa pinulungan aron maka-relate o makasabot sa bag-ong henerasyon. (bobbygnalzaro@gmail.com)