MOKABAT 5,000 ka mga sako sa bugas ang naharang sa Naval Forces Eastern Mindanao (NFEM) gikan sa usa ka lansa gumikan pakyas kini nga nakapakita sa shipping clearance.
Human madawat ang impormasyon nga dunay moagi nga lansa sa kadagatan sa Davao Oriental nga dunay karga nga kadudahang mga produkto, gilayong mihimo og joint counter-action operations ang NFEM-Naval Task Group 71.
Uban sa operasyon ang BRP Magat Salamat (Patrol Ship/PS20) ug BRP Heracleo Allano (Patrol Craft 376), Joint Task Force Haribon uban sa duha ka tim sa Naval Special Operations Unit 7 gamit ang duha ka patrol boat alas 10:50 sa gabii niadtong Sabado.
Duol sa baybayon sa Arena Point sa Davao Oriental nasugatan ang lansa nga M/L Sunlight nga dunay karga nga mokabat kon kulang 5,000 ka sako sa bugas gikan Zamboanga City padung na unta sa usa ka bodega sa Maco Compostela Valley Province.
Ang kapitan sa maong lansa nga si Captain Hadun Hamil nagbutyag nga karga nila ang 12 ka mga crew ug dunay 5,000 ka sako sa Angelica High Premium/super long grain white rice (50kgs/sack) nga walay dokumento hinungdan nga gi-hold sila sa awtoridad.
Kagahapon sa buntag, ang National Food Authority (NFA) nagpahigayon og inspection sa mga nakumpiska nga bugas apan gibutyag sa opisyal sa NFA nga walay authentic NFA shipping permits/transport documents ang pagkarga sa maong mga bugas.
Dugang nasayran gikan sa kapitan nga katulo ka higayon na silang mihimo niini gikan Zamboanga City padung sa usa ka private yards sa Maco, ComVal.
Hinuon, wala pa masayri kung ismagol ba ang maong mga bugas diin padayon ang gihimong imbestigasyon sa NFA sa maong hitabo.
Sa kasamtangan ang maong mga bugas gikustodiya sa Capt. Feranil Pier, sa NSFA, Panacan, Davao City ingon man ang 12 ka mga crew ug ang kapitan sa lansa alang sa tukman disposasyon. (JPC)