NAKATAGPILAW man ko sa Justice League. Mao ra man gud gihapon ang storyline sa mga miagi nilang superhero movies. Pero lingaw ra siya ha, labi na ang iyang visual.
Ang tinuod, wa koy klarong katug kay gikan mi sa whole day seminar sa Strategic Planning sa Sun.Star Publications nga gipahigayon sa Radisson Blu. Gikan didto nidiretso kog tan-aw, mao tingali nakatug ko.
In fairness, gibawi ni Flash nga maoy ilang komedyante. Lingaw sad ang mga scene ni Aquaman. Gwapa gihapon si Wonder Woman pero maihap ra ang iyang moments.
Ang karakter ni Cyborg kay nikalit la’g butho or nakatug na tingali ko ato. Pero si Ben Afleck isip Batman maoy pinaka-boring.
Predictable nga nabuhi si Superman kay di ba namatay man to siya sa “Superman vs. Batman”, mao karon siya say gihimong bida.
Okay ang action scenes ug hasta ang finale. Mas arang-arang ang Justice League kumparar sa Man of Steel ug Batman v. Superman. Ah, tingali nakamata na ko ani. Hehe…
Trip Ubusan
Alegre lagi ang trailer sa “Trip Ubusan: The Lolas vs. Zombies” nilang Jose Manalo, Wally Bayola ug Paolo Ballesteros.
In character gyud sila sa maong pelikula isip Lola Tinidora, Lola Nidora ug Lola Tidora.
Sa trailer pa lang, sige na kog katawa. Kon wa ko masayup, kinopya ni sa hit Korean horror film nga “Train To Busan.”
Showing na ni ugma, November 22. Maorag mo-hit tingali ning salidaha. Hmm.. sure ko, box office hit ni.
Angkon na!
Kon tinuod man ganing mabdos si Ellen Adarna, wa gyuy rason nganong tagutaguon pa na nila.
Angkon na mo uy, grasya baya na. Unsa ma’y inyong kahadlokan nga pareho man mong single ni John Lloyd Cruz ug parehong sapian.
Maayo sad na aron mahipos na mo ug dili na mo magsige og balhin-balhin og uyab. Ouch! (Hehe...nangasaba si lolo).
Ingon ana man sad gud ko sa una, latagaw og hunahuna, pero sa higayon nga mahimo na kang ginikanan, anha na ka makaamgo kon unsa ang kinabuhi.
Social media
Kining nahitabo ni Mariel de Leon nga gibirahan ni Davao City Mayor Sara Duterte mao ni classic example nga “you’re vulnerable to create enemies in social media.”
Ang impormasyon sa social media, tinuod dali, paspas, pero ang downside sad ana, daghang fake, daghang feeling expert, daghang feeling bright ug gamayng sipyat o isyu post dayon sa social media. Halos tanan gusto og instant gratification. Ug grabe ang kanang gitawag og self-entitlement.
Hunong una kadiyot… ug palandunga ang imong pagka-active sa social media, kon wala ba ka apil sa gikaon sa sistema sa bag-ong teknolohiya.