Mongaya: Hinakotay sa 50 mil ka tawo

IMPORTANTE tinuod ang kadaghanon sa mga tawo kon maghisgot kitag tra­dis­yonal nga politika. Mao nga naningkamot ang mga organizer sa rali sa miaging Biyernes nga moabot sila og 50 mil.

Atong gipasabot ang giingong mass oath-taking sa PDP-Laban diha sa Plaza Independencia.

Apan yuna pa, matod sa usa nako ka higala nga hilig motan-aw og sports event sa kaulohan. Masulod sa Araneta Coliseum ang 25,000 ka mga tawo. Buot ipasabot, nagkinahanglan og duha ka Araneta Coliseum aron makaabot og 50 mil.

Ang pangutana, pareho diay kadak-a ang nahimutangan sa mga tawo og duha ka Araneta Coliseum? Sigi na lang kay mas importante man daw nga daghan tan-awn.

Bahala na og nagdala silag mga libreng balde nga napuno sa pagkaon. Bahala nag nagnihit ang mga bus sa lalawigan sa Sugbo kay giabangan aron manghakot og mga motambong sa maong rali.

Ang mahinungdanon karon mao ang kalit nga pagtubo sa mga probationary members sa PDP-Laban, ang partido sa administrasyon. Nakaingon ko nga probationary kay kasagaran kanila wala pa man maka-agi sa BMS kun Basic Membership Seminar sa maong partido.

Gani, wa pay PDP-Laban council ang Syudad sa Sugbo kay pulos pa man sab sila probationary members. Hinuon, sa punto de bista sa mga trapo, hinakot man ang ilang mga tawo, ang mas mahinungdanon mao ang kadaghanon, dili ang kalidad sa ilang na-mobilize.

Team Rama

Bisan pa man, makapahi­muot nga samtang ang na-rekrut sa PDP-Laban diha sa lalawigan mao ang mga kampyon. Sila ang mga mayor ug kongresista sama nilang Kong. Gwen Garcia. Lahi ang nahitabo sa Syudad sa Sugbo kay ang rekrut ni OPAV Mike Dino mao man ang Team Rama.

Mao kini ang partido nga kanhi loyalista sa UNA ni Jojo Binay unya ang lider ginganlan ni Presidente Rodrigo Roa Duterte nga drug lord protector. Samtang napildi ang kampiyon sa Team Rama nga si kanhi mayor Mike Rama, di pa sab makabarug ang iyang se­cond-in-command nga si Bise Mayor Ed Labella.

Bisan ang paninguha nga himuong Barug PDP Laban ang ilang grupo wa dayon kini makabarog kay wa makonsulta ang mga loyalista ni Rama.

Grupo sab kini nga wa magkahiusa sa ilang pagsuporta kang Presidente Duterte kay grabi man ka kritiko sa presidente si Konsehal Jun Alcover.

Dugang pa, subidahon ang pag-insister niini nga ligdong ilang grupo kay gawas sa giingong druglord protector ang ilang lider, duna man silay duha ka konsehal ug usa ka barangay kapitan nga nasuspenso sa Ombudsman.

Dakong kalampusan ni OPAV ug Bisaya Na Pud ang dakong mobilisasyon. Apan tukiunon pa kon pila ang na-mobilize sa Team Rama.