MIPADAYAG og kusganong pagsupak ang mga kadagkuan sa Simbahang Katoliko niining balaodnon nga nag-ong-ong karon sa Ubos Balay-balauran kabahin sa dissolution of marriage. Kay alang sa simbahan sagrado ang kaminyuon. Ang maong balaodnon, House Bill 6027, gipangamahanan mismo si House Speaker Pantaleon Alvarez nga maghatag ug kahigayonan nga magkabuwag ang magtiayon sa dili kuti ug taas nga proseso sama sa annulment. Gawas sa annulment, gitugot usab ang legal separation. Ang divorce bill nag-ong-ong usab karon sa Kongreso.
Ambot morag mahulog man kini nga personal nga katuyuan ni Alvarez kinsa dugay nang buwag sa iyang orihinal nga asawa ug dayag nga adunay kulukadidang nga mao man gani iyang kanunay’ng dad-on bisan sa mga opisyal nga kalihukan.
Napagya nga si Alvarez adunay kulukadidang nga batan-on sa dihang nag-away ang iyang kabit ug ang kabit usab ni Davao Congressman Tonyboy Floriendo. Midepensa si Alvarez nga dugay nang buwag siya sa iyang asawa ug aduna siyay katungod nga magbaton ug laing asawa kay netibo o lumad man siya. Mao siguro kini ang hinungdan nga iyang ipasar kining maong balaodnon aron hingpit na siyang gawasnon gikan sa talikala sa kaminyoon.
Pero daghan ang makabenipisyo niini kon mahimo kining balaod labi pa ang mga pobre kay puwerting mahala ang annulment karon. Ang pangayo sa mga abogado sa annulment P200 mil package apil na ang psychologist. Dili maka-afford ang mga pobre ani. Kining balaodnon ni Alvarez wala kaayo gasto ang magti-ayon kay mopestisyon lang sila sa korte. Mga duha o tulo lang ka hearing ang himuon. Basta magarintiyahan lang ang kaugmaon sa mga anak labi pa sa suporta ug custody.
Ang tan-awon unta pod sa simbahan mao ang kaayuhan sa magtiayon kon dili na mahilot ang panagbingkil sa magti-ayon. Gusto ba nilang mag-antos ang asawa o ang bana ba kaha gumikan kay dili na sila malipayon sa ilang panagtipon? (bobbygnalzaro@gmail.com)