SULAYAN sa Xavier University (XU) Crusaders ang ilang katakos pag-abli sa ilang kampanya sa Philippine Collegiate Champions League (PCCL) Mindanao Finals, diin pormal abrihon karong adlawa didto sa Davao City.
Dad-on sa Crusaders ni coach Rocky Calingin ang ngalan sa Cagayan de Oro City human gihawod nila ang city-wide eliminations atol sa CDOBF college men’s final niadtong Nobyembre 11.
Karon, maatbang sa mga batos ni Calingin ang mas kusog nga linya diin gilangkoban sa mga kampyon gikan sa General Santos City, Pagadian City, Zamboanga City ug host Davao.
“It’s definitely a tough field. But like I said before, my boys have grown mature in the game and more determined than before,” ingon ni Calingin.
Kanunay ipadumdum ni Calingin ang iyang mga players matag ensayo nila nga ipagawas ang ilang tanan labina giunsa nila pagkapmit sa kampyonato kontra sa Southern de Oro Philippines College (SPC) Sharks agi sa 106-100 hingpit nga daug sa final.
Naa lang ang XU sa ika-upat ug igo lang nitungtong sa kataposang silya ngadto sa semifinal, diin natagak nila ang numero uno Liceo de Cagayan University.
Si shooting guard Sean Tindoy, kinsa nihuman og 25 puntos pagkampon sa XU kontra SPC, maoy usa sa saligando ni Calingin uban sa six-foot-four center nga si Janrey Manatad.
“If they will show that kind of attitude, I think we will have nice chances in the Mindanao finals,” matod ni Calingin.