ANDAM moabag si kanhi Department of Environment and Natural Resources (DENR) secretary Gina Lopez sa kagamhanan sa dakbayan sa Mandaue alang sa plano niini nga ipaubos sa rehabilitasyon ang sapa sa Butuanon sa di pa himuon sa dakbayan ang pagpahigayon sa International River Summit sunod tuig.
Sa dihang nahinabi sa mga tigblaita, si Lopez nagkanayon nga andam siya nga mosugyot sa teknolohiya sa pagtarong sa riverbank ug disenyo unya sa pagpalambo sa sapa.
“Kung yung ilog basurahan, walang mangyayari sa buhay. Kailangan mahalin ang ilog, revere, nourish tapos aangat ang buhay ng lahat,” saysay ni Lopez.
Nagtuo si Lopez nga marehabilitar sa mubong panahon ang Butuanon sanglit ang kahugaw niini di pareho sa Pasig River sa kaulohan.
Si Lopez nibisita sa dakbayan ug nisusi sa sapa kagahapon sa buntag hangtod pagka-udto.
Matod niya nga angayang papahawaon sa sapa ang mga informal settlers tungod kay sagad nila way mga tarong nga kasilyas ug direktang ipanglabay ang mga basura niini sa sapa.
Apan sugyot niya nga ang mga apektadong residente ibalhin sa sakto ug nindot nga relocation area aron kini nga makombinsir sa pagbalhin.
Si Lopez kinsa maoy chair sa River Pasig Rehabilitation maoy nimugna sa “river warriors” nga maoy gitugyanan sa pag-amuma sa Pasig River human kini nila gipaubos sa rehabilitasyon.
Paambit niya nga sa Mandaue, mahimong himuon sa kagamhanan ang mga informal settlers isip river warrior human sila mabalhin.
“First thing that we have to do is the design which is very aesthetic yung design na saksakan ng maganda. Kasi based on the design, mag-cocooperate yung mga tao. Para sa design dapat green kase maganda at tsaka yung mga barangay, relocates, informal settlers, kailangan aangat ang buhay nila,” matod ni Lopez sa mga tigbalita.
Dako usab ang kalipay ni Mayor Luigi Quisumbing sa pagbisita ni Lopez ug pagpadayag sa pagtabang niini sa dakbayan.
“We are happy that she has expressed interest in helping to bring awareness to our efforts to rehabilitate the River and restore it to its former glory. This is especially timely as we have just launched the awareness campaign for the International River Summit next year,” nagkanayon si Quisumbing sa iyang Facebook post.
“She is one person who can make things happen. Positive kaayo ang akong outlook karon nga makaya nato ang atong gimbuhaton tungod kay nakaya man gani to niya (og limpyo ang mga mas hugaw nga sapa sa Pasig) It was not just one river, pwerting daghana,” matod ni Konsehal Carmelino del Mar kalabot sa pagtabang ni Lopez sa dakbayan.
Samtang sa pakighinabi sab sa mga tigbalita ni Environmental Management Bureau 7 Director William Cuñado, kini niingon nga di na nila palabayon og waste water ug mga kemikal ang mga kompanya duol sa sapa sugod sunod semana.
Dugang niya nga ilang pahibaw-on ang mga kompanya nga makig-alayon sa mga pribadong entidad aron paglimpyo sa ilang waste water aron kini magamit pag-usab o usa pa kini ilabay.
Atol sa iyang pagbisita kagahapon sa buntag, si Lopez nihimo og presentasyon sa mga kadagkuan sa dakbayan, EMB ug DENR kalabot sa iyang mga natabangan nga sapa sa Manila. (JPP)