SINGKUWENTA y singko ka partisipante gikan sa Department of Education (DepEd) sa Davao Occidental Division mitambong sa Substance Abuse Prevention Education nga gilusad sa Philippine Drug Enforcement Agency (Pdea) 11 sa Malita niadtong Nobyembre 21, Lunes.
Si Pdea-Davao officer-in-charge Iav Naravy Duquiatan nagsulti nga ang 55 ka partisipante mao ang mga coordinators, guidance counselor ug prefect discipline ubos sa DepEd DavOcc Division's National Drug Education Program (NDEP).
Ang Substance Abuse Prevention Education gilusad sa pag-obserba sa Drug Abuse Prevention and Control Week, nga gisaulog matag ikatulong semana sa Nobyembre subay sa Presidential Proclamation No. 124 nga giisyu niadtong Nobyembre 26, 2001.
Gibutyag ni Duquiatan nga ang tema karong tuiga mao ang "Makinig Muna--Ang Pakikinig sa mga Bata o Kabataan ay Daan Upang Tulungan Silang Lumaki na Malusog at Ligtas."
Matud niya nga ang selebrasyon karong tuiga nagtumong sa pagpalapad sa kahibawo sa mga Pinoy bahin sa di maayong epekto sa ilegal nga druga di lang sa panglawas apan lakip na sab ang sosyal, ekonomikanhon, ug politikal nga pagtubo ug paglambo sa nasud.
"The trained personnel will be our force multiplier in the demand reduction campaign program in their respective schools," pagklaro ni Duquiatan.
Apil sa mga topiko nga gihisgutan mao ang Basic Drug Identification and Its Ill Effects; Signs and Symptoms of a Substance Abuser; Reasons Why People Turns to Drugs, Powers and Duties of Pdea ug ang Salient Provisions sa Republic Act 9165, labing nailhan nga Comprehensive Dangerous Drugs Act of 2002.
Gikanayon ni Duquiatan nga ang ilang mga personahe naghisgut sab sa Article IV, Section 44 sa Republic Act 9165, sa paghimo sa ilang mandato isip "Person in Authority" sulod sa tugkaran sa tunghaan.
Giklaro sab niya nga ang Pdea-11 nagtuo nga ang mas epektibo nga paagi nga duna sila batok sa pag-abuso sa druga sa nasud mao ang pinaagi saktong edukasyon sa kabataan, tinun-an ug ang nag-abuso niini makaamgo sa di maayong epekto sa druga ngadto sa lawas sa tawo ug ang mga linugdangan kon malulong na niini.