DEAR Dr. Fritz,
Maayong adlaw kanimo ug sa libo-libo nga tigpanubay ning imong kolum diri sa SuperB. Ako diay si Isabella nga taga Bansalan. Karon man god bag-ohay lamang dako kaayo nga balita ang pagkamatay ni Isabel Granada tungod sa aneurysm. Fans baya ko ni Isabel, dok.
Gusto unta nako mahibaw-an kung unsa diay ang makaaghat niining aneurysm- kay kung atong tan-awon si Isabel Granada, healthy man siya ug di pod siya taba. Gani, ang iya daw ginakaon ato kasagaran gulay. Apan, ngano man nga nagka- aneurysm siya ug nibuto pa gyud?
Unsa man ang makapaaghat sa pagbuto sa aneurysm, dok? Naglibog gyud ko, dok, ug nahadlok sad, ilabi na kung makahinumdom ko kang Isabel Granada nga daw walay sakit tan- awon ug nikalit na lamang ug ka-comatose nga sa kadugayan mao ang iyang namatyan.
Daghang salamat, dok. Magpaabot ko sa imong tubag.
Isabela of Bansalan
*****
Dear Isabela of Bansalan,
Puwerte bitaw tong kalita ang pagkamatay ni Isabel Granada ug daghan gayud ang nakugang kay maayo ra man to siya kaayo. Gani, sa mga gipakita sa telebisyon, nagduwa pa to siya og badminton ba to o tennis usa nibuto ang iyang aneurysm nga mao ang hinungdan nga na-comatose siya ug human sa pipila ka adlaw mao ang iyang gikamatyan.
Kini man gong aneurysm, ugat kini nga niburot nga mamahimong mahimutang sa utok. Mamahimo nga mahitabo kini sa mga tawo nga anaa kini nagdagan sa kaliwat sa pamilya. Mao nga mamahimo nga mougmad kini sa mga tawo nga tan-awon nato nga normal ug maayo og lawas. Gani kung tan-awon lamang nimo ang usa ka tawo, lisud kani matino, inay lamang kung mopailawom ang usa ka pasyente sa MRI o sa CT scan.
Mao nga sa sitwasiyon ni Isabel Granada, wala gyuy makit-an nga sintomas sa hitsura niini kung tan-awon lamang nato siya sa pisikal nga aspeto.
Mao nga sa akong paminaw kang Isabel Granada mamahimo nga kaliwat nila sa pamilya ang maong aneurysm - kay wala man pod toy altapresyon si Isabel Granada. Gani, fit na fit siya, mahiligon sa pasingot ug di pod hingaon og tambok.
Apan, tungod kay daghan pa kita og pagahisgutan ug wala naman kitay lugar karon, tugoti ako nga ato kini nga padayunon og pagtuki sa mga sunod nga edisyon niining atong patik. Hangtud sa sunod!
Dr. Fritz
*****
Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!