SA unang higayon sud sa kapin 30 ka tuig nga kasaulogan sa kapistahan sa Señor Sto. Niño, dad-on ang pilgrim images sa Birhen sa Guadalupe ug Milagrusong Bata sa National Shrine of Nuestra Virgen de la Regla sa dakbayan sa Lapu-Lapu.
Samtang, dili na ang galleon nga gipanag-iya sa banayng Ouano ang sakyan sa duha ka balaang mga imahen sa sunod tuig kondili ang barko na sa Philippine Navy, BRP Bagobo AT-293.
Pipila lang kini sa mga kabag-ohan nga gipahibawo sa Agustinian nga kaparian sa Basilica Minore del Sto. Niño sa kasaulogan sa kapistahan sa Señor Sto. Niño sa sunod tuig sa press conference kagahapon.
Si Padre Ric Anthony Reyes, OSA, secretary sa Augustinian Community ug pangu sa Secretariat, Fiesta Senor 2018, nibutyag nga ang mga kabag-ohan nga ipatuman himuon aron mapalapdan ang debosyon ngadto sa ubang mga deboto uban sa pagtugot ni Arsobispo Jose Palma.
Matod niya kini ang tambag sa ilang mga superior sa Augustinian Community nga nakakita sa pastoral nga panginahanglan nga ipakatap ang debosyon ngadto sa mga deboto sa Lapu-Lapu ug sa sunod katuigan sa kasikbit nga mga lugar sa Metro Cebu.
Ang kapistahan sugdan sa unang nobernaryo sa Enero 11, 2018 pinaagi sa Walk with Jesus samtang, ang adlaw sa kapistahan kay sa Enero 21.
Sa ikasiyam ka adlaw sa nobenaryo, Enero 19, 2018, naa gihapon ang naandan nga Walk with Mary nga sundan sa alas 5:30 sa buntag nga misa sa pilgrim center sa basilica.
Dayon isunod ang Traslacion diin dad-on ang duha ka balaang mga imahen sa Our Lady of Guadalupe de Cebu ug Sr. Sto. Niño sa St. Joseph National Shrine sa dakbayan sa Mandaue pinaagi sa motorkada.
Pagka Enero 20, Sabado, himuon ang “send-off” mass sa alas 2 sa kaadlawon nga mas sayo og usa ka oras gikan sa naandan nga alas 3 sa kaadlawon, dayon dad-on ang duha ka mga imahen pinaagi sa motorkada paingon sa Virgen de Regla Shrine ug Parish sa siyudad sa Lapu alang sa veneration sa mga deboto.
Alas 6:30 sa buntag, dad-on ang pilgrim images sa Muelle Osmeña alang sa Fluvial Procession sa Mactan Channel sakay sa barko sa Philippine Navy subay sa naandan nga rota diin modunggo ang barko sa Pier Uno.
Sugod sa 2018, ipa-raffle na ngadto sa shipping companies alang sa kahigayonan nga modala sa mga imahen atol sa fluvial procession diin ang Philippine Navy ang nabunutan alang sa sunod tuig.
Si Padre Aladdin Luzon, OSA, councilor sa Augustinian Province, nibutyag nga mahimo pa moapil sa sunod raffle ang banay nga Ouano.
“Our apology if some are being hurt with this, dili namo intention...Kining desires sa mga Augustinian nga kaparian wala namo gi-monopolize ang devotion, ato ning gi-share. This is our missionary task so among gi-share kining devotion, mao man ni ang atong thrust as evangelizers,” pasabot ni Luzon.
Si Atty. Paulino Yabao, legal adviser Fiesta Señor 2018, makadaghan nihangyo ang banay nga Ouano nga ipadayon ang naandan nga paggamit sa ilang galleon sa matag fluvial procession, apan nahukman sa mga labaw sa Augustinian community nga ipa-raffle sa mga kompaniya og barko nga gamiton isip galleon.