Unsa man kahay hinungdan nganong gibirahan si Kap Imok Rupinta sa Barangay Ermita sa upat ka mga tawo didto sa lungsod sa Liloan?
Duha gyud ka bala ang niigo diha sa agtang ni Rupinta mao nga daw gisiguro gyud nga mamatay kini.
Nahitabo ang maong pag-ambush dihang nipadulong sa pag-uli si Rupinta sa iyang balay sa Liloan. Di na lang kita mahibulong nganong ang kapitan sa Ermita tua magpuyo na sa Liloan. Si Kap Philip Zafra sa Association of Barangay Councils (ABC) bitaw di na man sab taga Syudad sa Sugbo kay naa man mag-uli-an sa Consolacion.
Bisan pa man, karaang lider sa Barangay Ermita kini si anhing Kap Imok Rupinta panahon pa kaniadto ni Marcos.
Lider kini si Imok kaniadto sa Bupalo nga, sa akong mahinumdoman, maoy mosukol sa kapulisan kon hilabtan ang mga rali sa oposisyon nga gisalmotan sa Panaghiusa ug PDP.
Lider sab kini siya sa mga Carbon vendors nga tighatagan sab og suporta sa mga protesta nga akong nasalmotan.
Tuod man, nahimo kini siyang barangay kapitan sa Ermita.
Sa kadugay na niyang lider sa maong barangay, di ko mahibulong nga si Imok lisod gyud pildihon.
Ang ako lang katingalahan mao na kadtong napadpad siya sa kampo sa Team Rama ug ang grabing pagsanay sa gidiling drugas sa Ermita.
Gani, ang maong barangay nahimo mang tago-anan sa dakong drug lord nga si Rowen "Yawa" Secretaria kaniadtong wa pa kini mabirahi.
Dayon nasuspenso kini uban sa pipila ka mga opisyal sa barangay kay wala motabang sa panawagan sa PDEA atol sa usa ka ronda.
Public knowledge na kini busa di na angay lalison pa.
Ika-35 na
Dako nakong pasalamat ug nalipay ko nga sa taas-taas nga bahin sa akong kinabuhi, naapil ko sa pamilya sa SunStar Cebu.
Nagsugod ko isip usa ka Region Editor kaniadtong 1993 hangtod nga nahimong City Editor.
Sa Oktubre 23, 1994, nahimo kitang managing editor sa igsuon sa SunStar Cebu nga ang Superbalita.
Dako natong kalipay nga nakatabang kita sa pagtubo sa duha ka mantalaan hangtod sa akong early retirement sa 2010.
Bisan pa man, naa gihapon kita isip usa ka kolumnista sa duha ka mantalaan.
Kagahapon gisaulog ang ika-35 nga sumad sa pagkahimugo sa Sunstar Cebu. Di pa lang dugay sa miaging Oktubre 23, ato sab nga gisaulog ang anibersaryo sa Superbalita Cebu.
Congratulations kanatong tanan!
@anol_cebu sa Twitter