BAG-O na tuod ang atong Secretary sa Department of Environment and Natural Resources (DENR), pero mura og dili kampante si Presidente Rodrigo Roa Duterte kang Roy Cimatu tungod kay medyo dali tintalon sa mga bigtime mining industry nga nag-operate sa atong nasud karon.
Sukad sa paglingkod niya isip ika-16 nga presidente sa atong nasud, iyang gipili ang tinuod nga makakalikasan nga si Gina Lopez nga maoy mamuno aron ampingan ang atong kina-iyahan, apan sa dautang kapalaran gisalikway siya sa mga burges nga sakop sa Commission on Appointments (CA).
Ang open-pit mining anaa sa atong Philippine Mining Laws of 1995 apan sa paglingkod ni Presidente Rodrigo Duterte, iya kining gisuspenso tungod kay dako kinig kadaut sa atong kinaiyahan.
Sa milabay nga semana, nanawagan ang Mining Industry Coordinating Council(MICC) nga wagtangon na ang open- pit mining tungod kay apektado na pag-ayo ang ilang operation, mas dali nilang matumbok ang ilang tuyo pagkuha sa bulawan, nickel, copper ug uban pa, ikumpara sa kinaraan nga sistema sa pagmina.
Pero ang open-pit mining, dili kuoton kon asa ang bahandi nga gusto nilang kuhaan, kon dili bungkagon ang habog nga kabuliran hangtud nga makuha nila ang ilang tuyo sa tiilan sa bukid nga ilang gibungkag, pero ang dakong kadaut mao ang mga yuta ug bato nga ilang tinumpag nga motabon sa mga kasapaan ug mga kaumahan sa atong mga mag-uuma sa kapatagan hinungdan sa dakong lunop o baha nga atong mahiagoman.
Pabor si Sec. Cimatu sa panawagan sa Mining Industry Coordinating Council (MICC) nga wagtangon na ang open-pit mining apan, napalaw siya tugod kay gi-reject sa atong Presidente Duterte ang panawagan sa MICC.
Kini ang delikado kon sa kadugayan matintal si Cimattu sa tanyag gikan sa 43 nga mining industry sa atong nasud, unsay mahitabo sa atong gi-ampingan nga kina-iyan?
Nagbahad na ang atong Presidente sa mga Mining Industry kinsa kadtong mohatag og revolutionary taxes ngadto sa mga rebeldeng New People's Army iyang tak-opan ang operasyon.
Natingala bitaw ta nga ang mga legal front nila nga millitanteng grupo, nagasinggit og National Industrialization, pero ang ilang mga kakampi nga armado sa bukid, dagko og gidawat sa mga langyaw nga kapitalista? Ano ba ito, pera pera lang?
Hinaut unta nga ang ma plano sa atong presidente suportahan sa iyang mga maayong sakop sa gabinete ug dili madala og saburno sa mga dagkong kapitalistang langyaw nga maoy naguba sa atong kinaiyahan, tungod kay makakinaiyahan ang atong presidente.