Nalzaro: Kinsay mastermind?
WALA ko mokuwestiyon sa atong kapulisan ug ingon man sa mga saksi kabahin sa pagpamanhig patay ni Ermita Barangay Captain Felicisismo “Imok” Rupinta kay ila man kanang trabaho. Pero ako lang silang pahimangnoan nga dili lang magdali-dali sa ilang imbestigasyon aron lang daygon sa publiko nga dali nilang nasulbad ang kaso.
Nanghambog na ang kapulisan nga makonsiderar nga sulbad na ang kasong pagpatay kang Imok human nila madakpi ang usa sa mga suspek nga si Jimmy Largo. Si Largo gitumbok sa common law wife ni Rupinta nga si Jocelyn Mendoza nga usa sa upat ka mga tawo nga mibanhig kanila niadtong Huwebes sa Tayud, Liloan.
Gipasi-atab usab nila nga ila nang nailhan ang mastermind o nagpaluyo sa maong krimen kay gun-for-hire ra man kini si Largo. Aber, giunsa man nila sa pag-ila sa mastermind nga nanghimakak man kini si Largo sa iyang kalambigitan sa maong krimen? Sa kaso nga murder labi pa kon binuhatan sa gun-for-hire conspiracy gyud kana. Ug mailhan lamang ang mastermind kon “mokanta” ang gun for hire. Kanang siya gyud ang motumbok sa mastermind nga maoy nagbayad kaniya.
Ang gun-for-hire maoy lig-ong testigo kay siya adunay kontak sa mastermind nga maoy nagbayad kaniya. Unya giingon sa mga kadagkuan sa kapulisan nga dili pulitika ang nagpaluyo sa pagpatay kang Imok apan karon adunay anggulo nga posibling pulitika diay. Atong huwaton kon maapil ba gyud sa kapulisan ang pagpasaka og kaso sa mastermind. Kinsa kaha ni siya no?
Nakaklaro gyud kaha si Ms. Mendoza nga si Largo usa sa mga nagbanhig kanila? Gabii nahitabo ang krimen ug ngitngit ang maong lugar. Klaro kaha ang iyang panan-aw? Sa dihang nahitabo ang buto-buto wala kaha sila mohapa sa iyang gilingkuran? Lahi baya ang imbestigasyon, lahi ang pagpasaka og kaso sa piskaliya ug lahi ang paghusay sa merito sa kaso didto na sa hukamanan. Kon adunay lama sa mga pagduda, paborable kini sa akusado. (bobbygnalzaro@gmail.com)