WA man nganli apan dali kaayong nakapahid kang Mayor Tomas Osmeña ang mga sakop sa oposisyon sa kamatayon ni Kapitany Imo Rupinta.
Wa nila damha nga wa pa gani makatuhop ang maong propaganda, nasikop dayon ang suspek nga si Jimmy Largo kay maoy gitumbok sa testigo nga kapuyo ni Kap Imok diha sa Liloan. Nagkanayon ang kapulisan nga layo ra sa politika ang motibo sa maong pagpatay.
Tungod niini, imbes malipay sa dali nga kasulbaran, dali kaayong nakakwestyon ang mga dapig sa oposisyon sa kapulisan ug sa testigo.
Kay ilang tuyo unta nga lubagon ang istorya aron mapahid kang Tomas, moingon na sila nga angayang palawman aron matino ang kamatuoran. Gani, gikuwestyon pa kon kasaligan ba ang testimonya sa testigo nga nanumbag sa suspek kay kaila man niya kini.
Ang nakapait sa maong istorya nga gipalakaw sa oposisyon kay di katuohan nga si Osmeña mopapatay kang Imok kay kontra sila.
Una, mas nailhan ang mga Osmeña nga mopildi sa ilang mga kontra sa politika sa eleksyon. Wa sa kasaysayan sa politika sa Sugbo nga mga Osmeña mopapatay og kaatbang sa politika. Sa akong nasayran, si Serging pa ang namatyan og tawo kaniadto.
Ikaduha, di man molansar pagka mayor si Imok. Unya kalayo pa sa eleksyon sa 2019 diin di man swing vote ang Ermita.
Ibutang lang nato for the sake of argument nga di kasaligan ang testigo ug sayop ang pagsikop kang Largo, unsa man ang laing teyorya?
Alang kanako, mas katuohan pa nga natokhang si Imok tungod kay dunay record si Kap nga nasuspenso kay wala motabang sa PDEA.
Apan kon tokhang man ang tinuod, subidahon nga moguwa kini sa imbestigasyon sa kapulisan. Unya, kinsay moduso sa maong punto, kining mga bag-ong sakop sa PDP-Laban? Ang mga Yellow sa Syudad sa Sugbo?
Bisan pa man, mas motuo ko sa bersyon sa kapulisan labi na kay positibo gyud ang pag-ila sa kapuyo ni Kap Imok ang Jimmy Largo.
Bisag unsaon pagdaot sa kredibilidad sa testigo diha sa media ug sa Facebook, mas masabot man sa hulagway nga gipatik sa Sun.Star nga nakaila siya sa testigo ug positibo gyud siya nga mao kini ang nibira kang Kap Imok.
Bisan unsa man ang alibi ni Largo, huyang ra kini sa mata sa balaod kon itandi sa positibong pagtumbok kaniya sa testigo.
Di ba mas maayo karon nga atangan nato kon unsay resulta sa imbestigasyon sa kapulisan aron masikop ang uban pang mga suspek lakip ang mastermind nga giingong kontra ni Imok diha sa Barangay Ermita?
Sa pagkakaron, duna nay nagtuyok nga bersyon diha sa Facebook sama sa Maghisgot Kitag Politika Bay sa sumpay nianang gi-anunsyo sa kapulisan nga murag gikan ra usab sa mga tinugyanan. (@anol_cebu sa Twitter)