KINSA bay magtuo nga ang usa ka yanong traysikol drayber niadto usa sa mga inila ug sinaligang brodkaster sa probinsya sa Bohol karon?
Gawas sa pagkabrodkaster, nag-alagad sab sa publiko si Carlito “Lito” Responte, 59, isip konsehal sa Brgy. Totolan, Dauis, sa maong probinsya.
“I started my life as self supporting tricycle driver,” ni Responte, kinsa may pito ka mga anak nga nakahuman na sab sa ilang pagtuon.
Matod niya nga iyang napakaon ang iyang pamilya pinaagi sa pagdrayb ug panagat sa una. Tungod sab sa maong panginabuhi, nakahuman siya sa iyang pagtuon.
Siya nagserbisyo isip magsisibya sud na sa 34 ka tuig ug nagserbisyo sa ilang barangay isip barangay secretary sud sa 13 ka tuig, usa sa mga napiling konsehal sa barangay niadtong 2013.
Susama sa uban, di sayon ang mga naagian ni Responte aron lang makab-ot ang kalampusan.
Nagsugod siya sa media isip reporter, tigsuwat og balita, co-anchor ug nahimong anchor, nagkaprograma sa radyo, nahimong officer-in-charge ug general manager sa sibyanaan DyTR.
Apan sa dihang napili siyang kagawad sa barangay niadtong 2013, nihawa siya sa iyang posisyon isip GM apan gihimo gihapon siyang consultant sa iyang sibyaanan nga gitrabahuan sud sa kapin 3 ka dekada.
“Pagkagawad nako di naman nako kaayo kaya nga general manager ko nga naa mi mga meetings, seminars nga biyaan nako ang akong trabaho didto maong ni-resign ko,” sumala pa niya.
Pagbalanse sa oras
Si Responte nagkanayon nga importante sa iyang pagpangalagad sa radyo ug barangay ang sakto nga pagbalanse sa iyang oras.
“Mauwaw man ko di kaserbisyo sa barangay kay naa man kos radyo. Sige ka’g panlibak unya labaw pud ka, mao na ang problema,” dugang niya.
Niadtong siya nagsilbing barangay secretary, iyang buhaton nga sa di pa siya moadto sa estasyunan sa radyo, moagi una siya sa barangay hall ug siguraduon nga andam na ang kinahanglanon anang adlawa.
Kon wa siyay lakaw human sa iyang programa sa radyo, mobalik siya barangay hall.
Karon, magkanunayan siya sa barangay kon wa pa ang iyang programa sa radyo.
Hulga
Wa gilimod ni Responte nga giuwan na usab siya og daghang hulga tungod sa paghimo sa iyang trabaho.
“Kadawat nako’g alas nga may bala ug naa’y dugo. Speed nga alas, giputos ang bala,” saysay niya.
Paambit niya nga lisod kaniya nga naghupot og programa nga alang sa tanan tungod kay bisan balanse ang iyang pagkuha sa mga habig, kanunay siyang makontrahan kon di kauyon ang pikas partido sa iyang mga gisibya.
“Until now, wa na mahibaw akong misis nganung daghan kaayo na og suga sa balay ug nganong daghan kog iro,” ni Responte.
Nakasulbad og krimen
Usa sa mga di malimtan nga kasinatian ni Responte sa dihang nakatabang siya sa pagkasulbad sa dakong tulis sa probinsiya nga nahitabo niadtong 2007.
“I was able to solve a robbery within 15 minutes through radio. Now, I received a text message from an informant,” paambit niya.
Padayag niya nga usa ka gwardiya sa usa ka cell site maoy nakakita sa pagpanulis sa negosyante sa kopras niadto.
Tungod sa tip sa gwardiya, iyang gialerto ang tanang mga unit commander sa Bohol ug katapusan niyang gitawagan mao ang provincial commander.
Nasikop ang mga suspek sa highway robbery ug siya gipasidunggan sa provincial peace and order council tungod sa iyang dakong natampo sa pagsulbad sa krimen pinaagi sa iyang programa.
Gawas niini, usa sa mga legasiya ni Responte sa probinsya mao nga silay nipasiugda sa pagbutang og mga panultion sa bibliya sa mga traysikol.
Matod niya nga ang mga hulagway o nakasuwat sa mga traysikol sa Tagbilaran niadto mga bastos maong sila nagsugod pagpanghatag og mga stickers ug tabla nga gipintalan og mga basahon sa bibliya.
“Niabot ang punto nga gi-require sa tanang traysikol, inig parehistro ug renew sa permit, kinahanglan ka nga naa kay passage of scripture sa likod sa traysikol. Maong karon, sa entire Philippines ang sa Tagbilaran lang nga ang mga traysikol, naay passage of biblical scriptures."
Iyang prinsipyo sa kinabuhi: “Maghimo tag matarong para gyud tang mahilangit. We always learn from our mistakes. Positive gyud ta.”