Fred Fuentes Monternel
Lorega Proper, Cebu City
GIPASIKLAPAN ni Ernie ang iyang Rolex nga relo-de-pulso samtang padayon siyang nagdrayib sa bag-o niyang Honda Civic nga puti ang kolor. Naghaguros ang dagan niini subay sa dalan nasyonal. Lapas na sa alas dose sa tungang gabii. Gikan siya sa siyudad sa siyudad sa Bogo kay mitambong sa birthday party sa suod niyang higala nga abogado. Tungod kay naglami ang estorya ug tinagayay sa red wine uban ang sumsuman nga litsong baka ug litsong pabo, nagabhian gayud si Ernie sa pagpauli paingon sa siyudad sa Sugbo. Naniguro siya pagpauli bisan sa paghawid sa higalang abogado nga magbuntagay sila uban sa mga higala niini nga taga siyudad sa Bogo, tungod kay nakalukat na siyag plane ticket para sa Manila alang sa alas kuwatro nga biyahe sa kaadlawon.
Isip lisensiyadong civil engineer, makigkita kaniya ang usa ka negusyanteng Insek kay siyay padumalahon sa gipanag-iya niining dakong construction firm sa Makati City. Diyutay ra ang giinom ni Ernie nga red wine ug wa kaayo makadatom kaniya ang espiritu sa alak tungod sa kadaghan sa sumsuman nga iyang gibakbak sa iyang tiyan. Mao nga anaa siya sa kundisyon nga maka-drayib pa sa iyang awto.
Hilabihang kusoga sa pagpadagan ni Ernie sa iyang sakyanan. Mimarka ang speedometer gikan sa 124 ngadto sa 149 ang gikusgon ug mo-menor lang og diyutay ang dagan kon dunay kurbadang dalan ang maagian. Hapit na lang palupara ni Ernie ang sakyanan. Dihang nagdanga-danga na siya sa kurbada nga dalan sa Eme, kalit niyang giyatakan ang brake.sa awto diha sa inanay nga pagmenor sa dagan. Nasugat man god sa panan-aw ni Ernie ang daw bola sa basketbol nga kahayag nga nag-untol-untol diha sa taliwala sa kurbada sa dalan nasyonal. Misantop sa iyang hunahuna nga usa kini ka unidentified flying object (UFO) nga milandig sa maong dapit. Gipahunong gayud ni Ernie ang iyang sakyanan. Susihon niya kon unsa kining butanga ug gikan ba kini sa kawanangan.
“Kahabog sa bungtod ug kalawom sa titip sa matag kilid sa kurbadang dalan. Yatis, giabat man tingali ko dinhi. Dili man sad ni santilmo kay mora man gyud og bola sa basketbol ang gidak-on sa kahayag nga padayong nag-untol-untol sa taliwalang bahin sa kurbadang dalan!” nagkitab-kitab ang baba ni Ernie.
Unya kalit nga nadungog ni Ernie nga may linagubo ug mihugpaas pagdagan diha sa dalan nga kurbada. Nahasiga ang iyang mga mata sa iyang nakita. Pagka dako sa sawa nga mihagsa sa dalan gikan sa habog nga bungtod. Ang sawa sama gayud sa gidak-on sa dakong punoan sa lubi. Nagdula-dula dayon ang ulo niini sa lingin nga kahayag nga usa diay ka trabungko. Dugay nga naniid si Ernie nga gikuyawan. Tayming sab nga way sakyanan nga miagi gikan sa siyudad sa Sugbo. Samtang ang sawa nagduwa sa trabungko, kalit kining miulpot ug nahulog ngadto sa kinaubsang.titip. Midulhog kini dayon paingon sa ubos ang dakong lawas sa maong sawa.
Natrapik gyud si Ernie sa kubada. Nakapanguros siya nga mipasirit og padagan sa iyang awto. Dihang hingpit na gayud nga mipatighulog ang tibuok lawas sa dakong sawa ngadto sa kinaubsang titip kay misunod sa trabungko, wala nay nagbabag sa dalan nga kurbada. (Katapusan)