NISAAD si City legal attorney Yuri Benluan nga sunod semana ilang iduso ngadto sa buhatan sa Sangguniang Panglungsod ang ilang gihimong pakisusi kalabot niadtong bomb scare nga gi-post sa Cebu Flash Report (CFR) sa ilang Facebook page.
Gitug-an ni Benluan nga identified na ang mga nagpaluyo sa maong fake news nga gipakatap sa ilang FB account nga unang nigawas niadtong sayong bahin sa Hulyo ning tuiga diin giingong adunay bomba nga gibilin sa usa ka sari-sari store sa Barangay Basak, Lapu-Lapu.
Nasuta nga usa lang ka transistor radio nga gisud og plastic ang wa tuyoa nga nahibilin niadtong lalake nga nagpasilong sa tindahan sa dihang nagpa-abot og kasakyan.
“More than one,”sa pamahayag sa abogado kalabot sa gidaghanon sa nagpaluyo sa fake news ug nagdumili una sa paghingalan sa kadtong mga nangalambigit.
Ang endorsement gisukipan og kopya sa mga affidavit nga ilang nahipos ug resulta sa gihimong imbestigasyon sa Police Regional Office (PRO)7sa ilang Anti-Cybercrime Group.
Natala sa draft nga gihimo sa city attorney’s office nga naghatag og authority sa konseho nga kapasakaan og pormal nga kaso ang CFR sa ilang nahimong kalapasan, diin ang Lapu-Lapu City magsilbing complainant.
Nagkanayon si Benluan nga kasong kalapasan sa Section 6 sa Republic Act 10175 kon Anti-Cyber Crime Law and Presidential Decree 1727, o malicious dissemination of false information regarding explosives ang ilang isang-at batok unya sa hingtungdan. (FVQ)