AMBOT kon Kristiyano ba kining “kanhi laos nga pulitiko” nga naka-ako man siya sa pagbugal-bugal sa usa ka patay. Kitang mga Romano Katoliko mopakita man gyud og respito sa usa ka patay bisan pa man kon unsa ang iyang kagahapon. Mao bitaw nang maminaw ka sa necrological services atol sa haya puro mga pagdayeg ang imong mabati gikan sa speakers.
Kon wala kay ika-estorya nga maayo alang sa namatay kay imo ba kaha siyang kontra, mas maayo nga maghilum nalang isip pagrespito ngadto sa nagbangutan nga banay. Apan lahi kining gihimo aning “kanhi laos nga pulitiko” ngadto sa gipatay nga si Ermita Barangay Captain Felisicimo “Imok” Rupinta. Matod niya nga nalipay siya sa mga lumolupyo sa Ermita kay gawasnon na sila gikan sa pagkontrolar ni Imok nga iyang gipasanginlan nga drug protector ug maoy responsable sa pagkuyanap sa illegal nga drugas diha sa Ermita. Louy intawon si Imok, dili na makatubag ning maong pasangil.
Ang mao niyang pamahayag daw susama ra nga “nalipay siya nga gipatay si Imok.” Tarong ba kanang maong pamahayag gikan sa usa ka taas nga opisyal sa dakbayan? Morag wala man niya girespito ang nagbangutan nga banay. Unsa kahay bation sa iyang kabanay no kon inig abot sa panahon nga siya na usab ang hayaon, adunay mga tawo nga modaot ug mobugal-bugal kaniya?
Nagduda ko ani niya nga aduna kini siyay sakit sa utok. Matod pa sa research, adunay 200 ka klase sa sakit sa utok. Ang mga common niini mao kanang depression, bi-polar, dementia ug schizophrenia. Kitang tanan posibleng aduna ani apan dili lang grabe. Kanang pagkaluoran, laing klase sab na. Ug adunay gitawag nga schadenfreude. Usa kini ka German term nga gisagop na sa English.
Unsa man kining schadenfreude? Mao kini ang mga tawo nga malipay kon ang ilang kontra nag-ilaid na sa tuman kalisod. Mao kini ang mga tawo nga malipay ug mokatawa kon ilang makita nga nagkalisud, nasukarap ug nasukamod na ang ilang mga kaaway. Kon sa title sa drama sa radyo pa n: “Gikalipay ko ang mga kasakit mo.” Unya tarong nimo na? Ang tawo nga adunay pangisip nga ingon niini, tulibagbag.