5.1 magnitude nga linog mitay-og

NAKASINATI og 5.1 magnitude nga linog mga alas 2:57 sa kaadlawon sa Byernes, Disyembre 1, sa lungsod sa Wao, Lanao del Sur.

Gibutyag ni Philippine Institute of Volcanology and Seismology (Phivolcs) Northern Mindanao Director Marcial Labininay nga ang episentro makita sa northeast sa lungsod sa Wao ug tectonic ang origin niini.

Adunay kalawomon nga 9 kilometro ug gilaumang mosunod pa ang pipila ka mga aftershocks.

Ang Intensity V nabati sa lungsod sa Kadingilan ug Intensity IV sa lungsod sa Pangantukan. Adunay Intensity III sa lungsod sa Maramag nga nahimutang sa probinsya sa Bukidnon.

Denhi sa siyudad sa Cagayan de Oro, nabati ang Intensity II lakip ang kasikbit nga lungsod sa Misamis Oriental.

Hinuon, wala pay niabot nga report nga adunay damyos sa maong pagtay-og, labina ang mga nanganlan nga mga lungsod ang padayon pa ning panahona sa pagmonitor sa ilang palibot.

Kahinumduman niadto lamang bulan sa Septiyembre gitay-og gihapon sa kusog nga linog ang maong dapit diin daghan sa mga balay ang naguba human mitala kini og 6.0 magnitude.