SUGOD karong buwana, mopagawas ang Bangko Sentral ng Pilipinas og bag-ong P5 nga mga sensilyo.
Ang New Generation Currency (NGC) nga P5 magpakita sa nawong sa bayani nga si Andres Bonifacio.
Ang pagpagawas sa bag-ong P5 nga sensilyo pahinungod sa ika-154 nga birthday anniversary sa bayani niadtong Nobiyembre 30 ug sa iyang ika-120 nga anibersaryo sa kamatayon niadtong Mayo 10.
Si Bonifacio, usa ka maisog nga lider ug usa sa mga nagtukod sa Katipunan, usa ka sikreto nga organisasyon hangtod sa pagkadiskobri niini niadtong 1896 nga nisangko sa Philippine Revolution ug sa deklarasyon sa kaugalingnan sa Pilipinas niadtong 1898. Si Bonifacio namatay niadtong Mayo 10, 1897.
Matod sa BSP ang ubang denomination sa NGC ipagawas sa sirkulasyon sa Enero sa sunod tuig.
Ang nawong sa amahan sa Philippine Revolution makita sa pikas bahin sa P5 nga sensiyo uban sa markings nga “ANDRES BONIFACIO,” “5 PISO” ug “REPUBLIKA NG PILIPINAS” sa bold nga font ug microprints, ug mint mark.
Sa pikas bahin sa sensiyo, makita ang Tayabak, usa ka klase sa endemic nga tanom sa Pilipinas nga makita lang sa usa ka lugar ug mopilit og tag-as nga mga punoan sa kahoy sa lasang; ang logo sa BSP ug ang “Bangko Sentral ng Pilipinas” sa microprint nga marka.
Ang bag-ong P5 NGC coin kay 25 millimeters ang sukod sa dayametro ug motimbang og kapin kun kulang 7.4 gramos.
Ang BSP nidugang ang ubang mga sensilyo sa NGC Series mag-feature usab sa logo sa BSP, mga bayani ug endemic flora uban sa desinyo sa NGC Banknote Series nga gilusad niadtong 2010 nga nag-highlight usab sa kahayupan sa nasod.