Ikaduhang ‘killer’ ni Imok nasikop

NADAKPAN sa Regional Spe­cial Operations Group (RSOG) kagahapon sa hapon ang ikaduhang suspek sa pagpatay kang Ermita Brgy. Captain Felicisimo “Imok” Rupinta sa sityo Manga, Brgy. Jugan, Consolacion, a­­­mihanang Sugbo.

Apan si Jordan Gera, 39, kinsa usa ka vendor sa merkado publiko sa Carbon, nanghimakak sa iyang kalambigitan sa pagpatay sa kapitan.

Si Jocilyn Mendoza, kapuyo ni Rupinta, positibong niila kang Gera dihang sila nag-atubang na.

“Isulti kinsay nagsugo nimo kay basin mapasaylo ta pa ka,” sulti ni Mendoza kang Gera dihang sila nag-atubang na.

“Tan-awa og maayo ang akong nawong, Mam, kay naa ra ba koy pamilya,” tubag ni Gera, kinsa hugtanong nanghimakak sa pasangil.

Matod ni Police Regional Director Jose Mario Espino nga usa si Gera nga giila sa mga saksi nga ning-ambush kang Rupinta.

Giingong usa siya sa mga namusil kang Rupinta uban sa unang nasikop nga si Jimmy Largo.

Giingon nga suod silang managhigala ni Largo isip mga manindahay sa merkado.

Gitumbok usab siyang usa sa mga hired killer sa dapit.

Matod ni Espino nga usa ka informant ang nipahibawo kanila sa nahimutangan ni Gera niadtong Huwebes.

Sugod sa mga alas 10 sa gabii niadtong Huwebes, ila na kining gipanid-an aron dakpon.

Kagahapon sa mga ala 1 pasado sa hapon, ilang nasikop si Gera, kinsa ilang nakuhaan og usa ka motorsiklong XRM (plate number 8543 GT).

Si Espino niingon nga duna pa silay laing duha ka mga suspek nga gipangita nga kauban sa pagpatay kang Rupinta.

Ila na usab nga nailhan ang labing minos duha ka mga mastermind sa pagpatay.

Si Rupinta gibanhigan niadtong Nobiyembre 24 sa gabii dihang paingon na mopauli sa iyang balay sa lungsod sa Liloan uban sa iyang kapuyo nga si Mendoza.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph