DI lang diay ang pagdili sa mga ilimnong makahubog mga 300 ka metros gikan sa parada sa Sinulog karong enero 2018. Nanglihok na karon ang mga ahensya alang sa pagpangandam sa pagdagsa unya sa linibo nga mga bisita sa Syudad sa Sugbo.
Sugod sunod semana, duna na unyay dugang mga enforcer ubos sa Task Force Discipline aron modumala sa trapiko sa kadalanan, lakip na usab ang pagpakanaog sa anti-littering ordinance.
Kining anti-littering ordinance mao ang pagdili sa pagpataka lang sa paglabay og basura bisan asa sa Syudad sa Sugbo.
Ambot kon ngano, dunay duha ka kinaiya ang akong nabantayan dinhi sa atua kon walay makit-an nga mga pulis o mga enforcer.
Una, di mosunod sa mga balaod sa trapiko. Di man lang mga drayber sa PUJ ang badlungon. Naa man say mga pasahero nga moinsister og sakay o kanaog kon asa ilang gusto.
Mga pedestrian sab motuyo og labang sa dalan bisan wala sa pedestrian lane. O molabang gyud sa dalan bisan “green” o “Go” ang signal.
Ikaduha, magpataka lang sa paglabay sa ilang basura. Di na lang gyud mag-effort nga mangitag basurahan. Magsalig nga dunay mosunod nga tiglimpyo. Ang resulta, hugaw kaayo ang atong palibot.
Di gyud ko makalimot kadtong usa ka tour namo sa South Korea dihang nag-stopover ang taxi nga among nasakyan kay mag-CR mi.
Nabantayan nga anha gyud siya molabay sa basurahan. Dihang nasipyat siya sa paglabay sa sayop nga basurahan kay nag-segregation na man sila, iya kining gikuot og bibalhin sa saktong basurahan.
Nindota kaha kon ingon niini ang tanang mga Sugboanon.
Apan kay lisod man molaom nga mausab dayon ang atong kinaiya tayming sa Sinulog karong sunod bulan, maayo na lang kining inisyatiba ni Deputy Mayor Dave Tumulak nga mang-rekrut og dugang mga enforcer aron mapakanaog kining pagpahapsay sa trapiko ug balaod nga anti-littering.
RCAO 7
Dakong tabang dinhi sa atua kining pagbalik ni Chief Justice Ma. Lourdes Sereno sa Regional Court Administration Office (RCAO) dinhi sa Central Visayas, matod pa sa duha ka retirado ug respetadong mga huwes dinhi sa Sugbo nga sila si Judge Simeon Dumdum Jr. ug Meindrado Paredes.
Apan bisan pa og nakatabang kini sa pagpahapsay sa serbisyo sa maong sanga sa kagamhanan dinhi sa atong rehiyon, gihimo kining isyo batok kang CJ Sereno karong diha sa Kongreso.
Ngano? Tungod sa politika ug kining kasuyaon sa usa ka sakop sa Korte Suprema, naabot kini sa reklamo ni Atty. Lorenzo Gadon alang sa pagpa-impeach ni Sereno.
Alang kanako, usa ka ehemplo lang kini sa mga walay hinungdan nga mga isyu nga giisa batok kang Sereno diha sa Kongreso.
Budget
Alang kanako, nag-usik lang gyud og oras ug sa pundo sa kagamhanan kining pagduso sa mga kaalyado ni Speaker Bebot Alvarez diha sa Kongreso batok kang Sereno.
Mas maayo pa kon unahon nila ang mas importante nga mga isyu kabahin sa atong 2018 nga budget. (@anol_cebu sa Twitter)