MATOD pa sa taho sa usa ka non-government organization nga dili lang ang mga maanindot ug nabaniog nga beach resorts ug mga tourist destinations ang gi-anhi sa mga turistang langiyaw dinhi sa Sugbo. Apil na sa gi-anhi dinhi sa mga foreign tourists mao ang atong kababayen-an labi pa ang mga batan-on nga nagbaligya sa ilang dungog. Dayag kaayo nga mikuyanap na ang sex tourism dinhi sa Sugbo.
Matod ni Atty. Stephanie Tan, legal officer sa Children’s Legal Bureau (CLB) nga maoy nag-document sa mga kaso sa child trafficking ug ubang mga kaso nga naglambigit sa kababayen-an nga mikuyanap ang maong kaso niining nangaging katuigan. Ang uban niini mga babaye nga nagkahimamat sa ilang mga ‘partners’ pinaagi sa ‘on line dating’ nga maoy tuyuon sa pag-anhi sa mga langiyaw.
Tinuod bitaw ning maong taho. Atong nakita kining maong mga babaye nga nagkuyog-kuyog aning mga langiyaw. Ang uban mga mag-short og pakigol unya ang mga paa morag lipak, magkuyog anang nga langiyaw nga dagko kaayo. Klaro kaayo nga ang maong mga babaye bayaran. Mao ni subo nga imahin sa atong kababayen-an nga ang kuwarta lang sa mga langiyaw ang ilang gi-apas.
Kawad-on gihapon ang nagtukmod aning maong mga babaye nga magbaligya sa ilang dungog. Pero dili lang ang mga walay edukasyon ang naghimo niini kay sumala sa akong nahibaw-an bisan kadtong mga professionals naghimo gihapon niini. Panguwarta lang gyud ang tumong. Ang uban ang mga ginikanan mismo maoy naglawog sa ilang mga menor de edad nga anak ngadto sa mga langiyaw kay dali ra ang kuwarta.
Mas hayahay man ang pangita gamit ang ilang dungog kay sa motrabaho. Mao ni ang klaseng mga babaye nga tapulan nga gusto lang og easy money. Niadtong panahon sa Ikaduhang Gubat sa Kalibutan sa dihang gi-ataki kita sa mga Hapon, mosinggit ang atong mga katiguwangan nga ‘hapa, kay naay Hapon!’. Apan karon ang mga kababayen-an mosinggit na nga ‘hayang kay naay Hapon’. Hapon nga nagdala og lapad. Pagkatoytoy! (bobbygnalzaro@gmail.com)