LUHA sa kasakit ug kalipay maoy midayandayan sa makasaysayon nga paglangkat ni Mary Joy Tabal sa iyang ikalimang sunodsunod nga titulo sa National Milo Marathon nga natapos kagahapon sa Cebu City Sports Center.
Gipakita sa Sugboanong Olympian ang kasingkasing sa usa ka hanas ug tiunay nga kampiyon pinaagi sa pagdominar sa lumba gikan sa sinugdanan ug hangtod na sa iyang pagtabok sa finish line sa oras nga 2:58:01 segundos.
Apan nagpahipi sa kadaugan ang dakong kasub-anan human mitaliwan ang iyang amahan nga si Rolando, 58, sa dihang giatake kini sa kasingkasing, usa ka adlaw sa wa pa ang lumba.
Dangoyngoy sa hilak nga mi-ubo dala ang pagbakho maoy gituldok sa 28-anyos nga lumad nga taga barangay Guba, dakbayan sa Sugbo, sa lumba nga iyang gihulagway nga maoy pinakalisod niyang nasagubang.
Gitug-an ni Tabal nga sukad sa iyang paghiabot sa niaging semana gikan sa iyang training didto sa Italy, wa niya mahimamat ang iyang amahan.
Apan sa iyang pagpakighinabi niini sa telepono mipadayag kini nga sa finish line na lang sila mag-abot - butang nga wala mahitabo.
Mao unta kadto ang unang pagtan-aw sa iyang amahan sukad siya nahimong kampiyon sa Milo Marathon.
Sa pagsugod pa lang sa lumba, tataw nga aduna nay pagduhaduha si Tabal sa iyang kaugalingon kon kini makasugakod ba sa nahitabo sa iyang pamilya.
“Mohunong na unta ko sa first 10K turning point sa may Plaza Independencia. Apan nisantop lang og kalit sa akong huna-huna si Papa. Nawala ang sakit sa akong tiil ug kabug-at sa akong lawas. Ako nang gikalimtan usa ang tanan na nahitabo ug ni sugod na og focus sa dagan para sa iyaha,” saysay ni Tabal.
Ang kakulang sa pahuway ug katulog maoy nakapaluya kaniya. Apan tungod sa iyang lig-ong determinasyon nibalik ang iyang kadasig inubanan sa iyang mga saad ngadto sa iyang amahan kinsa nasugamak sa dili tukmang kamatayon.
Sakit man tuod, apan dako ang pagtuo ni Tabal nga kining mga pagsuway sa iyang kinabuhi, adunay igong katuyoan kay kini pagbuot sa Kahitas-an.
Sa kasaysayan sa Milo Marathon si Tabal maoy unang runner nga nakalangkat sa titulo sa lima ka sunodsunod nga katuigan.
Si Christabel Martes (3:04:20) ug Jho-an Villarma (3:11:26) mao nagsunod ni Tabal alang sa ikaduha ug ikatulong puwesto.
Samtang sa men men’s division, si Joerge Andrade sa Digos City ang milupig sa mga betera ug tang-ang mga runner. Siya may oras nga 2:39:34 aron sakmiton ang kampiyonato.
“Naka-apil nako og regional races mga five times pero una ni nako ron na national finals,” matod ni Andrade kinsa ni third place lang sa qualifying race sa General Santos City. Nagsunod kaniya sila si Eric Panique (2:42:10) sa second place ug si Olympian Eduardo Buenavista (2:43:34) sa ikatulo,
Samtang ang top three sa 21K mao sila si Arian Arois (1:15:21), Ychon Agustin Jr. (1:18:22) ug Prince Joey Lee (1:18:32) sa men’s division ug sila usab si Marychiel Morales (1:39:19), Jocelyn Elijeran (1:39:34) ug Lovely Andrin (1:46:29) ang mipatugbabaw sa women’s class. (RSC)