GITUSAK-TUSAK sa bala ang buhatan sa kapolisan lakip ang ilang mobile patrol car human misulong mga alas 3:15 sa kaadlawon sa Dominggo (Disyembre 3) ang gatusan ka mga miyembro sa New People's Army (NPA) sa Binuangan Police Station sa lungsod sa Binuangan, Misamis Oriental.
Ang mga sakop sa NPA gitouhang grupo nila Manuelito Satur, alyas Ka Muson, ug Ka Jakemm sa SGD, Guerilla Front 4B, ug platoon Ada nga gipangulohan ni Ka Romania, alyas Amboy, ug Platoon H pangulohan sab ni alyas Makong Manseguaio.
Apan pakyas sa ang mga NPA sa pagsulod sa istasyon human nakabantay sa ilang presensya ang mga pulis nga nakaduty niadtong tungora.
Nakigpinusilay ang mga pulis nga miabot ngadto sa 20 minutos.
Una na usab sila nakadawat og text nga adunay mga armadong grupo nga nagpanon paingon sa sentrong bahin sa lungsod ug gitouhang puntirya ang police station.
Sa maong pagbinayloay sa bala upat ka mga personahe sa maong istasyon ang nasamdan gumikan sa shrapnel nga nagikan sa M203 Rifle grenade gikan sa NPA.
Usa sa mga nasamdan mao ang station commander sa Binuangan Police Station nga mao si Police Senior Inspector Dante Hallazgo ug iyang mga sakop nga sila si Senior Police Officer 1 Ramonito Zambas, Police Officer (PO) 3 Alberto Bernadas, ug PO1 Joshua Satur kinsa nagpaalim pa sa balay tambalanan sa dapit.
Dali sab dayon miatras ang mga sakop sa NPA ug namara ug duha ka mga nanglabay nga forward truck aron ilang masakyan sa pagsibat agi sa Barangay Kitamban sa maong lungsod.
Si Police Senior Superintendent Rolando Destura ang Misamis Oriental provincial director ang dali sab dayon nga mipadala og reinforcement gikan sa Regional Mobile Force Battalion, Provincial Mobile Force Company, ug Provincial Intelligence Branch.
Gidayeg sab og maayo ni Police Chief Superintendent Timoteo Pacleb ang regional director sa Police Regional Office-Northern Mindanao ang kapolisan sa Binuangan tungod kay ilang napanalipdan ilang kaugalingon sa mga polis lakip ang ilang istasyon nga dili masudlan sa mga NPA nga gitouhang mokuha sab unta sa ilang mga armas niadtong tungora.
Hugot nga direktiba karon ni Pacleb nga mas pahugtan ang Target Hardening and Security Measures ug ilang kaikag sa pakig engkwentro maprteksyunan lamang ilang kaugalingon ug ilang buhatan lakip ang seguridad sa katawhan.