Nabakonahan gitawagan

WALA hatagi og awtoridad ang Cebu Provincial Health Office (PHO) sa Department of Health (DOH) sa pag-monitor sa kahimtang sa mga bata nga gihatagan og injection sa konrobers­yal nga dengue vaccine sa paglusad sa programa niadtong Hunyo.

Apan gibutyag sa pangulo sa Cebu PHO Dr. Rene Catan nimando na siya sa tanang city ug muncipal health units sa pagsubay ug paghimo sa listahan nga na­bakonahan.

Kini ang lakang nga gihimo sa PHO human sa pahibalo gikan sa Sanofi S.A., tiggama sa Dengvaxia vaccine nga dunay dili maayong epekto kini sa wala pa masakit og dengue.

Giawhag usab Catan ang mga ginikanan sa mga bata nga nabakonahan sa pag­duol sa ilang duol nga city ug municipal health offices aron ma-monitor ang panglawas.

Si Catan nisulti sa SunStar Cebu nga ang DOH 7 nagsugod sa papatuman sa pag-apud-apod sa vaccines sa kalungsoran ug component cities ubos sa Cebu province, apan wala nila giapil ang PHO, ang district ug provincial hospitals sa monitoring process.

Matod ni Catan, gitahasan lang sila sa pag-ila sa mga bata nga ipaubos sa pagpakona ug wala apil ang pag-monitor sa ilang panglawa human sa pagbakona.

Giapasabot ni Catan nga bugtong ang Vicente Sotto Memorial Medical Center (VSMMC) ang gitahasan sa pag-monitor sa status sa naba­konahan nga bata.

Ang VSMMC, usa ka tertiary-level hospital, ubos sa direkta nga pagdumala sa DOH.

“Basin they didn’t delegate it because we opposed the immediate distribution of the vaccines,” matod ni Catan.

Sayo ning tuiga, si Catan niluwat og oposisyon sa plano sa DOH sa pag-apud-apod sa dengue vaccine sa Cebu province human ang tighimo niini walay klaro sa ilang epekto sa bakona.

“Strong ang statement sa PHO nga kailangan prudent ta sa pag-gamit sa vaccine,” dason ni Catan.

Apan ang DOH nipadayon sa plano sa pag-apud-apod sa bakona niadtong Hunyo.

Ang DOH mopadayon unta sa ikaduhang hugna sa pagpakona subay sa programa sa sunod tuig apan nasuta kini nga nakamugna og grabe o severe dengue fever sa mga bata nga wala pa matapti sa virus.

Sa pamahayag sa Sanofi S.A nga base sa unom-ka-tuig nga clinical data, nasuta iug nakompormar nga ang Dengvaxia mosanta batok sa dengue fever apan kadto lang nagkasakit niini.

Nakita usab sa Sanofi S. A. nga dunay mas grabe pa nga kaso dengue virus human nabakonahan.

Tungod sa ulahing nasuta sa manufacturer, si DOH Secretary Francisco Duque nipahibalo sa miaging semana sa pagsuspenso sa programa hangtod ang Sanofi S.A. ug ang World Health Organization (WHO) mohatag og tambag sa pagpadayon sa bakona.

Apan ang PHO wala listahan sa mga bata nga nakadawat sa maong bakona busa si Catan nimando sa city ug municipal health officers Cebu province sa paghimo og pagpanglista sa mga bata nga nabakonahan.

Dugang mando ni Catan mao ang pag-ila kon kisan sa mga bata ang dunay history sa dengue ug wala aron pag­himo sa tukma nga lakang sa pag-monitor.

Bisan wala tahsi sa DOH, ang PHO mag-monitor na sa mga bata isip responsibilidad sa awtoridad sa panglawas.

Apan si Catan nitambag sa publiko nga dili mag-panic.