`Coco’ nindot, makapatandog
SAKTO ang mga movie review sa Hollywood nga ang “Coco” ang usa sa pinakanindot karon nga pelikula sa Pixar animation studios.
Dili lang ang visual kundi ang iyang estorya talagsaon, tugob sa emosyon ug makapatandog sa kasingkasing.
Ang “Coco” naghubit sa usa ka pamilya sa Mexico nga dako ang kasilag sa musika.
Kay dihang masuso pa lang si Coco, gibiyaan ni sila sa iyang amahan ug maoy gipalabi ang iyang career sa musika.
Sukad niadto, gisumpa sa iyang inahan ang musika. Banned sa ilang pamilya ang bisan unsang instrumento.
Nilabay ang pila ka mga henerasyon nga maoy ilang namat-an ang maong tradisyon.
Pareho nang patay ang mama ug papa ni Coco, kinsa karon nagpanuigon na og mga 90 kapin.
Karon, ang apo sa tuhod ni Coco, ang 12-anyos nga si Miguel Rivera andam buhaton ang tanan matuman lang ang iyang damgo nga mahisama sa iyang idol, ang legendary musician nga si Ernesto de la Cruz.
Mga upat ka henerasyon ang nalambigit sa estorya ug bisan ako wa ko magtuo nga ingon ato ang iyang mga twist.
Brayt kaayo ang writer aning salidaha. Maorag kumoton ang imong kasingkasing labi na sa dayong katapusan dihang giawit na ni Miguel ang “Remember Me.”
Kon wa pa mo kakita (naa pa ba sa mga sinehan?), sa DVD na lang tan-awa. Andam lang mo daan og panyo.
Spoiled brat?
Naunsa man ang inyong Maine Mendoza nga kalit man la’g kalami.
Nialayas kuno ni sa Amerika kay napuno na sa AlDub fans nga sige kuno og pamugos nga magkadayon sila ni Alden bisag wa siyay gusto.
Hala, kadako sa iyang nakuwarta tungod sa loveteam nila sa AlDub, sa endorsement pa lang mokabat na sa bilyon? Bisan pa’g pila siya katuig motrabaho sa Amerika dili siya katigum anang kantidara. Badlonga na inyong lodi uy! Hehe…
Year of the Dog
Base sa Chinese zodiac, Year of the Earth Dog ang 2018.
Suwerte kuno ang tuig sa mga iro kay matinud-anon nga naila nga man’s best friend. Sa ato pa, loyal ang mga tawo aning tuiga. Solid ang relasyon sa 2018.
Biggest stories
Unsay biggest stories sa local showbiz sa 2017?
Ang No. 3 tingali ang isyu ni Ellen Adarna nga nabuntis ni John Lloyd Cruz. Ang gipaabot na lang karon ang ilang kumpirmasyon.
Ang No. 2 top story alang nako ang pagkasikup sa Tawag ng Tanghalan season 1 champion Noven Belleza tungod sa kasong rape.
Ug ang No. 1 ang wala damhang kamatayon ni Isabel Granada.