DI lang Pilipinas ang nabiktima niining Dengvaxia nga giingong bakuna batok sa Dengue. Samtang mas importante karon unsaon pagluwas ang mga 700,000 nga nabakunahan, gikuyawan ko nga malawgaw hinuon kini tungod sa politika.
Lalim bay duna nay moingon nga ang nahitabo “genocide” kuno?
Ato lang klaruhon nga ang genocide tinuyo nga pagpatay sa usa ka dakong grupo sa mga tawo sama sa usa usa ka ethnic group o nasyon.
Di masulod sa maong kahulogan ang nahitabo karon kabahin sa Dengvaxia.
Una, klaro man nga wa tuyo-a nga patyon ang 700,000. Naghinanggaw tingale ang mga awtoridad kay wala makahulat nga masiguro nga luwas ang maong tambal apan wala tuyoa nga ilang patyon ang mga bata.
Ikaduha, wa pa man say namatay sa mga gibakunahan og Dengvaxia. Ang kuyaw kon human sa 30 ka bulan gikan sa ilang pagbakuna, mataptan ang usa ka bata og dengue. Mas grabi unya diay kuno ang epekto sa dengue.
Dako ang posibilidad nga sad-an ang miaging administrasyon kay nagdalidali kini. Wa sila makahulat og maayong resuta sa ubang nasud. O natarantar lang tungod sa pagsaka sa mga kasong dengue dinhi sa atua.
Apan di man sab malimod nga gipadayon sa kasamtangang administrasyon ang pagpamakuna. Gani, gipalapdan pa kini diin giapil na ang Sugbo hangtod nga karong bag-o, natino nga makadaot kini.
Lalim bay human sa 30 ka bulan, ang mga wala pa masakit og dengue dayon nabakunahan mas kuyaw na hinuon ang mahitabo. Usbon ko lang nga wala pay namatay. Ug mapangitaan pa kini og solusyon.
Sa pagkakaron, gipangsusi na sa DOH kinsa kadtong nabakunahan nga wala pa makasuway og dengue. Mas maayo man gud kon mahibaw-an kon si kinsa kini aron maateman dayon kon masakit.
Mas maayong manawagan kita sa mga kabarangayan nga manglimpyo sa palibot ug maniguro nga di makasanay ang mga lamok nga maoy makapatakod sa kagaw sa dengue.
Sa laing bahin, mas maayong atong sundon ang mga buhatong imbestigasyon sa atong mga medical experts ug sa Senado. Di lang nato panumbalingon kining nikalit pagka-eksperto sa dengue kay dunay gustong pasanginlan dayon.
Ang salawayon, alang kanako, mao kining dali kaayong makapamasangil tungod sa politika.
Imok
Dalaygon ang kapaspas sa imbestigasyon sa kapulisan aron masulbad kining pagpatay kang Kap Imok Rupinta sa Ermita.
Apan tungod sa pamulitika, duna dayoy nanaway sa kapaspas sa pagkasikop ug fall guy kuno daw ang nadakpang suspek nga si Jimmy Largo. Unsaon nga atat man kaayo silang makapahid sa kamatayon ni Imok ngadto kang Mayor Tomas Osmeña.
(@anol_cebu sa Twitter)