KASO. Human mapasaka-i og sumbong kriminal si kanhi Presidente Noynoy Aquino kabahin sa Mamasapano massacre, dako og purohan nga mapasakaan siya og lain nga kaso mahitungod sa dengue vaccine.
Si Justice Secretary Vit Aguirre II mimando sa National Bureau of Investigation (NBI) sa pagpahigayon og usa ka fact finding kabahin sa pagpalit sa dengue vaccine (dengvaxia) sa miaging administrasyon nga balor og P3 bilyunes.
Matod pa ni Secretary Aguirre II nga ang tanan dunay kalabutan sa pagpalit sa dengvaxia nga balor og P3 bilyunes apan dili magamit tungod kay di maayo ang epekto sa mga bata.
Natural nga maapil sa kaso si Aquino kay siya man ang amo sa kanhi secretary sa Department of Health (DOH). Sa ato pa, apil sab ang kanhi secretary sa DOH ug uban pa.
Ang paggamit sa dengvaxia gipaundang sa DOH tungod kay nadiskobrehan sa bag-o nga pagtuon nga dili maayo nga epekto sa mga bata nga bakonahan apan wa pa masakit og dengue kay ang epekto madengue na hinuon ang bata. Susmaryosep!
Ingon ani na ba gyud ka linga ang mga opisyales sa DOH sa miaging administrasyon? Nahibaw-an na unta kaniadto pa nga dunay epekto ang dengvaxia nga dili maayo sa wa pa gisugdan ang pagbakona sa mga bata.
Ang sertipikasyon sa World Health Organization (WHO) ug Food ang Drugs Administration (FDA) nga pasado ang dengvaxia dili igo nga basihan nga wa nay dautan epekto ngadto sa mga bata nga wa pa masakit og dengue.
Ang katuyoan sa tanang klase sa bakona mao ang pagprebentar nga dili matakdan og sakit sama sa dengue ang mga bata. Ato ba usab nga sabton nga ang mga responsible nga opisyal sa WHO ug FDA nga mipirma sa sertipikasyon nga pasado ang dengvaxia malakip sa kaso kon dunay ipasaka si Secretary Aguirre batok ni Aquino?
Atong sundan ang kalamboan ani nga kaso.
u25cf ● ●
PUNTO. Dunay punto si Cebu City Mayor Tomas Osmeña nga gigamit sa Team Rama sa pamulitika ang kamatayon ni Ermita Brgy. Capt. Imok Rupinta. Hangtod karon naa pa ang haya ni Kap Imok sa Ermita. Gipanghimakak ni kanhi mayor Mike Rama ang pasangil ni Tomas.
Si ABC president ug Konsehal Philip Zafra, kapitan sa Barangay Tisa, nagduda nga ang suspek nga sila si Jimmy Largo ug Jordan Gera mga “fall guys” lang kon maoy gibasol sa pagpusil-patay ni Imok.
Apan ang atong kapulisan mipasalig nga dili tumo-tumo ang ilang pagdakop ni Largo ug Gera tungod kay nailhan sila ni Jocelyn Mendoza, ang kauban-sakay ni anhing Imok sa pagbanhig kaniya didto sa Liloan.