DILI angayan nga manghambog ang atong kapulisan nga nasulbad na nila ang pagpamanhig-patay kang Ermita Barangay Captain Felicisimo “Imok” Rupinta pinaagi sa pagdakop sa duha ka mga suspek ug pag-ila sa mastermind. Ang pagdakop nila ni Jimmy Largo ug Jordan Gera, kinsa maoy gitumbok sa mga saksi nga maoy mi-ambush patay lang Rupinta niadtong gabii sa Nobiyembre 23, 2017 sa Tayud, Liloan, Cebu, dili pa lig-on ang mga ebidensiya nga sila na maoy nagpatay kang Imok.
Kanang positive identification puwede pa nang matuis ngadto sa mistaken identity.
Kon sa baseball o softball nga duwa pa ni, naka-first base pa lang ang atong kapulisan. Unya naa pa may second, third ug home bases usa maapil sa ihap o score ang naka-home base nga batter. Taas pa kini og latason sa dili pa makakab-ot og hustisya ang mga kabanay sa biktima.
Ato lang awhagon kining mga kadagkuan sa kapulisan labi pa si PRO 7 regional director Chief Supt. Jose Mario Espino nga dili magpagarpar nga ila na nga nailhan ang mastermind nga hangtod karon wala pa sila makahingalan ug gani makapasaka sa kaso ngadto sa piskaliya. Nailhan naman kaha ninyo apan nganong dili pa man ninyo ibutyag sa publiko ug iapil og kiha?
Kon dili maka-hingalan ang kapulisan ug makapasaka og kaso, mas maayo pa siguro nga maghilum una sila ug ilang sekreto nga ipadayon ang imbestigasyon nga walay pagpanghambog. Kini man ganing pagdakop ni Jordan Gera mahulog man gani nga kuwestiyonable gumikan kay gidakop siya nga walay warrant of arrest.
Usa ka semana na ang nakalabay human gipatay si Imok usa nadakpan si Gera nga walay warrant of arrest. Unya morason na pod ang atong kapulisan nga pinasikad sa “hot pursuit” ang ilang pagdakop sa suspetsado. Hangtod pila man ka adlaw applicable kining hot pursuit? Bisan usa ka buwan pa human mahitabo ang krimen? Matod pa sa akong amigong abogado nga wala lay Supreme Court jurisprudence ani mao nga gisakyan sa kapulisan. (bobbygnalzaro@gmail.com)