ANG kinabuhi sa tawo gikaluhaan na og mga hagit ug pagsulay.
Apan bisan pa niini, angay nga di mawagtangan og paglaom ang tawo kay sama sa panultion, adunay bangaw nga magpakita matag human sa ulan.
Gani, ang mapait nga kagahapon mao ang gihimong inspirasyon aron iyang sagubangon ang mga pagsuway sa kinabuhi.
Sama kini sa sugilanon sa kinabuhi ni Robert Lawrence Yap, 30.
Sa dihang batan-on pa kini, wa siya’y ambisyon sa kinabuhi. Ang iyaha lang mamasahero og motor ug multicab isip panginabuhian.
Apan nausab ang iyang panglantaw sa kinabuhi dihang tulo sa mga miyembro sa iyang pamilya ang anam-anam nga gikuha sa kahitas-an.
Ang ilang kinamaguwangan nga lalake sa upat ka magsuon namatay sa dihang nag-edad pa lang og 16-anyos.
Laing pagsulay ang niabot sa ilang pamilya sa dihang nasakit og brain tumor ang ilang amahan nga si Roger Yap ug wala na makatrabaho isip masyador sa buwangan.
Naglisod ang ilang pamilya kay kuwangon ra ang sweldo sa ilang inahan nga si Rosalinda nga usa ka maestra sa publikong tunghaan, sa pagpalit og mga tambal sa ilang amahan ug sa ilang inadlaw-adlaw nga panginahanglan.
Si Robert wa makahuman og eskwela nga unang nitungha sa kurso nga nursing sa Cebu Institute of Technology-University dayon Management Accounting.
Ang ilang amahan namatay tulo ka adlaw sa dili pa ang birthday niini ug gilubong sa mismo adlaw sa kasumaran sa iyang adlaw nga natawhan niadtong Disyembre 31, 2005 kun besperas sa Bag-ong Tuig.
Naminyo og usab si Rosalinda ug tua na magbase sa Estados Unidos diin si Robert ang apil sa gipetisyonan ug nakatrabaho didto.
Dihang tua na siya sa Florida, USA, lainlain nga klase sa trabaho ang nasuwayan ni Robert gikan sa pagka caregiver sud sa lima ka tuig hangtod sa pagka dishwasher dayon nahimo nga prep cook hangtod wok cook.
Sud sa pito ka adlaw sa matag semana kon siya motrabaho.
Si Robert niasoy nakasugat siya og mga kalisod sa iyang pagpanarbaho sa laing nasod sama sa pakig-estorya sa pinulungan nga English, kuwang og skills, ug siya mauwawon.
Samtang tua sa layo nga dapit sila si Robert, laing pagsulay ang nitay-og sa ilang pamilya dihang ang iyang ikaduha nga maguwang nga si Jason “Eton” Yap, usa ka pulis, ang napusilan patay sa gidudahang personalidad sa gidili nga drugas sa usa ka operasyon sa dakbayan sa Carcar duha ka tuig na ang nakalabay.
Hapit mawagtangan og paglaom si Robert apan, naningkamot siya nga makatutok sa trabaho alang sa iyang inahan ug manghod nga babaye nga si Mary Grace, 24.
Gumikan sa kakugihan motrabaho, si Robert nakatigom og P5 milyones nga maoy gipundar niini og negosyo, usa ka kan-anan sa lungsod sa Argao, habagatang Sugbo ug gipangan kini sa iyang maguwang nga si Eton, “Carenderia ni Eton.”
“I try to think nga tanan lumalabay ra. We have to do the best that we can in what we have in the situation that we are in,” paambit ni Robert.
Siya nidugang nga bisan unsa pa nga hagit ang moabot sa kinabuhi, padayon nga maningkamot ug dili mawagtangan sa paglaom ug pagsalig sa kaugalingon.