Mayor, kaubanan gisuspenso sa Ombud

MAYOR sa lungsod sa Dalaguete gisuspenso na usab sa Office of the Ombudsman.

Ang anti-graft office nisuspenso og tulo ka buwan kang Mayor Ronald Allan Cesante human makita nga guilty sa kasong simple misconduct ug neglect of duty.

Gawas kang Cesante, laing pito pa ka mga opisyal sa lungsod ang gipahamtangan sa susamang suspensiyon.

Kini naglakip nilang Municipal Administrator Rydal Cisneros, Chief of Police Clito Pia, Division Head Almar Villahermosa, Agricultural Technicians Juana Tangpos, Peter Bejarasco ug municipal deputy fish wardens Ferlipe Calisang ug Juan Millan.

Si Sesante nahasubo ning mao nga desisyon sa Ombudsman.

Sigun sa Ombudsman, nagpasagad sa ilang trabaho ang mayor ug ang mga opisyal.

Una na silang gipasanginlan nga direktang responsable sa pagkalunod sa usa ka fishing boat nga iya nilang Russell ug Jowleyn Heredia.

Sa pakisusi sa Ombudsman, ang panagatan anaa sa kostudiya sa mga respondent human nadakpan subay sa kalapasan sa Fisheries Code.

Apan dihang niigo ang bag­yong Queenie niadtong Nobiyembre 26, 2014, nalunod ang panagatan.

Una na unta nga nanghang­yo ang mga tag-iya nga ibalhin sa mas luwas nga dapit ang bangka nga panagatan, apan wa sila pamaniwa.

Matod sa Ombudsman, gipasa-pasa ang mga Heredia aron makalingkawas sa responsibilidad sa pagbalhin sa bangka.

“Their failure to act on said re­quests constitutes negligence.” nag­­­ka­nayon ang Ombudsman.

Nasubo si Cesante nga ang ilang pagtuman sa katungda­nan sa pagpanalipod sa kalikopan makapasuspenso nila.

Siya nisaysay nga human ma­kasohi og kalapasan sa Fisheries Law, ang mga tag-iya og panagatan nisumbalik og reklamo nila og gross neglect of duty batok niya ug ubang mga opisyal sa lungsod human sa usa ka tuig.

Siya nibutyag nga iyang gitugyan sa Environmental Legal Assistance Center (ELAC) ang pagtubag sa reklamo nga gipasaka sa mga tag-iya sa panagatan sa pagtuo nga usa kini ka strategic lawsuit against public participation (SLAPP) kini.

Nakasang-at na sila og motion for reconsideration sa Ombudsman niadtong Oktubre 12, apan samtang nagpaabot sa resolusyon niini, ang Department of Interior and Local Go­vernment (DILG) nipatuman sa suspension batok nila niadtong Nobiyembre 10.

Siya nanghinaot nga mahatagan og konsiderasyon sa Ombudsman ang ilang giduso nga motion for reconsideration.

“I know that my people were only doing their jobs of filing the cases after the operations of the Philippine Navy...” tipik sa text message sa mayor nga nadawat sa Superbalita Cebu kagahapon.