SECTIONS
Saturday, July 20, 2019

Diputado: Kaso na pod ni PNoy?

DUNAY duha ka mga init nga isyo karong semanaha.

Una, ang pagka-pildi sa La Salle batok sa Ateneo sa bag-o pa lang nahuman nga liga sa UAAP didto sa Manila.

Ikaduha, ang init kaayo nga eskandalo bahin sa bakuna batok sa Dengue nga gitawag og Dengvaxia.

● ● ●

Hilabihang biboha ang dula nga dihay 7 ka higayon nga nagparehas ang score og 7 sab ka higayon nga nag-usab usab nga molabaw sa score ang Ateneo og ang La Salle.

Apan sa kataposan, gibuntog sa Ateneo ang La Salle sa score nga 88-86 sa ilang best of 3 series nga nahuman kaniadtong Lunes sa hapon.

Wala na gyod mabangbang pa sa mga Archers ang kakusog og kalig-on sa mga basketbolista sa Ateneo.

Mao kini hinungdan nga saba kaayo ang ubang mga pasahero sa Mactan International Airport kaniadtong hapon sa Lunes samtang nagpadayon ang sambonot sa dula sa computer screen.

Daghan ang nalipay kay kusog ang wifi signal sa airport niadtong tungora.

Ang akong anak nga taga La Salle, wa ganahi mokaon sa iyang panihapon og kanunay lang nagbagotbot.

Kon nakakita lang mo sa dula kaniadtong Lunes sa hapon, segurado malingaw mo sa dula, hasta sab sa abiba sa mga nagtan-aw.

● ● ●

Hilabihan kainit ang batikos karon sa anti-dengue program sa nakalabay nga administrasyon ni PNoy.

Gamit ang pundo nga 3.5 bilyon ka pesos, migamit ang kagamhanan ni PNoy sa Dengvaxia vaccine aron pagsumpo sa nagka-grabe nga kaso sa dengue niadtong panahona.

Apan dunay dakong problema.

Ang Sanofi, nga maoy naghimo sa maong bakuna mipagawas og pahinumdom nga ang Dengvaxia vaccine epektibo lang sa mga tawo nga natakboyan na sa dengue apan delikado sa mga tawo nga wala pa makasulay sa dengue.

Buot ipasabot, dili angayan nga gamiton ang maong vaccine sa mga tawo nga wala pa matakboyi sa dengue.

Gani delikado kini kon gamiton kay matod pa, makahatag hinuon kini og mas grabe pa nga epekto sa mga tawo nga wala pa makasulay sa sakit nga dengue kon takboyan na gyod sila sa sakit nga dengue.

Susmariosep.

● ● ●

Matod pa, miabot na sa 730,000 ka mga bata nga nag-edad og 9 pataas nga gibakunahan sa dengvaxia sa miaging tuig.

Unya matod pa sa Volunteer Against Crime and Corruption (VACC), aduna nay tulo (3) ka mga kabataan sa Bataan nga namatay human mabakunahi sa dengvaxia kaniadtong Abril sa miaging tuig.

Tungod niini, mihangyo ang VACC sa Department of Justice nga abrihan ang kaso sa tulo ka mga bata aron mahibaw-an kon tungod ba sa dengvaxia ang ilang kamatayon.

● ● ●

Gawas sa ka delikado sa maong bakuna, adunay mga balita nga over-prized sab kuno ang pagkuha sa maong vaccine.

Gitandi ang presyo sa maong bakuna dinhi sa Pilipinas og presyo sa ubang mga nasod ug nakita nga dako kaayo og diperensiya sa presyo dinhi sa atong nasod.
Sobra kamahal ang pagkuha sa maong bakuna.

Kon mao kini, pila kaha sa 3.5 ka bilyon ka pesos ang nahulog sa bulsa sa mga kurakot sa nakalabay nga administrasyon?

Laing kaso na sab kini ni PNoy?

● ● ●

Unsa may angay mahitabo niini?

Matod pa sa tigpamaba ni PRRD nga si Harry Roque, imbestigahon kining maong eskandalo aron mahibaw-an ang tinuod niini.

Angay lang.

Angayan nga manubag ang mga opisyales sa Department of Health nga maoy responsable sa pagkuha sa maong bakuna.

Angayan sab nga kasohan sila aron makita sa katawhan nga seryoso ang kasamtangan nga administrasyon sa kampanya batok sa pangurakot.

Kon mamatud-an sab nga nag-atubang sa dakong kakuyaw ang mga kabataan nga nabakunahan sa dengvaxia, angayan sab nga manubag niini ang kagamahanan ni PNoy.

Asa na kaha ang gikaintapan nga Daang Matuwid ni PNoy?

● ● ●

Usa sa dakong problema sa Tagbilaran karong mga panahona ang kagubot sa trapiko.

Makita karong mga panahona ang taas nga mga linya sa mga sakyanan bisan sa mga karsada nga kaniadto luag sa trapiko.

Unsa may nakaingon niini?

Usa sa hinungdan ang nagkadaghan nga mga sakyanan.

Ikaduha, nagkadaghan ang sakyanan apan wa mausab ang gidak-on sa mga karsada.

Ikatulo mao ang pag-gamit sa mga karsada nga parkingan, terminal, garahe o ayohanan sa mga sakyanan.

Ikaupat ang dugay nga pag-ayo sa mga guba nga mga karsada.

Ikalima ang dugay nga pagtrabaho sa mga bag-ong mga karsada.

Ikaunom ang way disiplina nga mga drayber nga mopasakay og pasahero bisan sa tunga sa karsada.

● ● ●

Kon ingon niini ang sitwasyon karon, unsa na kaha kon gamiton na ang bag-o nga airport sa Panglao diin duha lang ka karsada ang mahimong gamiton padung sa maong airport?

Baga na man gani kaayo karon ang trapiko bisan kon mag-pista lang ang lungsod sa Dauis, unsa na kaha kon magdagan na ang bag-ong airport?

Tungod niini, angayan lang gyod nga dugangan ang karsada og palapdan pa ang mga karsada.
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph