Ernesto D. Lariosa
San Fernando, Cebu
WALA pa ko malipat sa imong kandiis, Angelina. Ipha kuno ang katuigan nga mingkutay sa gilay-on kanatong duha. Akong gisuwayan kagahapon, apan naumod ako sa abog nga mitungha diha sa nagkap-al nga hangin sa Sanciangko nga mibad-as sa Juan Luna ngadto sa Colon lahos sa Parian pasumbalik sa F. Borromeo ngadto sa Magallanes lagbas sa Plasa ug Fort San Pedro.
Bisan wa na diha ang mga hitsura sa talan-awon sa aseras, mga tinda sa ubos ug ibabaw sa mga bilding nasimhot ko ang kahumot sa imong pahiyom nga gibaliksan sa imong kandiis.
“Di kaha mangabubho si Susan kanako? Nganong gida mo ko dinhi? Duna kay isulti? Unsa man kay mamati ko?” Pusot-pusot ang imong pangutana.
“Ikaw Angelina ang natingban ko. Di si Susan nga dugay nang nagluib kanako human hagki ni Bobby, ang anak sa haring gangis sa tulonghaan.”
Nasabtan ko ikaw kay wa ka motukol dihang gipig-it ko ang lumoy mong kamot, hinunoa mihangad ka nako dungan sa pagbuklad sa pahiyom nga gibaliksan gyud sa imong kandiis.
“Naghuwat ron sila si Mama ug Papa kanako, Ramon. Di sila buot nga maabtan ko sa kagabhion.” Mitan-aw ko sa kilumkilom nga anam-anam mihabol sa Plasa. Talagsa na lang ang mga tawo nga nanuroy sa Plasa. Kinahanglang mahadlok ka sa kagabhion kay kaniya nagtago ang tampalasang panahon diha sa kamot sa mga mapahimuslanon sa mga matahom sama kanimo. Ang gabii, Angelina, tugob sa daman ug alimungaw sa imong kandiis nga nakulit na sa akong kasingkasing.
Sabado kadto mao pay paghuman sa atong Physical Education Class. Diha si Susan naghuwat kanako. Apan dali kong nakatipas sa pikas agianan diin didto naghuwat ka kanako. Suma sa atong sabot manan-aw ta sa pelikulang Bisaya nga gibituonan nila ni Mat Ranillo, Jr. ug Gloria Sevilla. Morag wa kita makatuhog sa salida kay nag-uros-uros ang atong mga hawok. Kadaghan magtapot ang atong mga ngabil. Di pul-an sa ilang kainit nga giduslitan sa atong pagbati. “Ram, ikaw na gayud ug wa nay lain ang akong gugma!” matod mo.
Miabot ang laing adlaw sa laing panagsabot. Ambot, naunsa to? Wa kita makapugong sa bul-og sa atong gugma. Mibakho ka kay nanamilit ka sa imong kaputli. Wa ko magbasol sa akong nahimo. Wa koy pgduda sa kong kmtinud-anon.
Apan kalit kang nawa human sa atong gradwasiyon. Gipangita ko ikaw sa daghang mga adlaw. Apan wa itugot nga kita magkahibalag. Mipadayon ko sa kolehiyo. Nahimong magbabalak sa pinulongang Cebuano ug Ingles.
Usa ka hapon mihug ko sa akong tampo sa Philippine Free Press sa Post Office sa City Hall. May babayeng mitutok nako. Milingiw ko, apan kalit nga nakahimungawong kanimo.
“Ikaw, Angelina?!” Tuaw ko. Misanong kas akong pagdapit sa International Rice House.
Gisaysay mo kanako ang dagan sa imong kapalaran. Buot kang makigkita kanako. Nakabasa ka sa akong mga balak bahin sa kapakyasan sa akong gugma. Apan gipugngan diay ka sa imong mga ginikanan kay nahigot ka na sa imong Amerikanong fiancé. Nakasabot ko sa imong paghilak kay nasamad ka sa imong pagtalikod kanako.
“That’s life, Angelina, I pray for your success in the States, Bye!” Mitindog ko pagdali kay di ko buot nga makasaksi ka sa akong mga luha dihang nagisi na sad ang akong balatian.
KARON wa damha nagkita na sad ta. Nagpaloap ka sa imong SSS contributions sa nangaging panahon sa imong kabatan-on. Ako sa akong higala nga abogado dinhi sa SSS.
Kon nahinumdom ka dinhing dapita nagpundok-pundok ang mga relis sa tren nga kaakuhan sa RFC (Relief Finance Corporation). Mahapon human sa atong klase sa Cebu City Colleges (Cebu Central Colleges) nga karon University of Cebu na, manglingkod ta sa relis, mag-estoryahay ug hiramay sa mga kamot samtang mag-ihap sa mga sakyanan ug mga parada nga molabay sa Jones Avenue.
Kadugay na niadto, uy, Angelina! Mga Senior C na kita. Miingon ka nga di na ka mobalik sa States. Giagda ko ikaw nga moadto ta sa Snow Sheen. Nahinumdom ka pa sa paburito nimong pansit gisado? Mag-estoryahay lang gud ta. Basin molubyok na sad ang kandiis mo, Angelina! (Katapusan)