DEAR Dr. Fritz,
Maayong buntag kanimo. Ako diay si Delfin nga taga Tagum. Ang akong problema, dok, kay maulaw ko nga ipangutana sa uban. Mao nga pahipi sa ko karon sa ngalan nga Delfin. Nalibog man god ko, dok, ning akong lubot kay nagakatol man. Sige naman lang ko og pangatol nga hapit naman masamad ning akong lubot. Unsa kaha ang hinungdan, dok, sa kakatol sa lubot?
Salamat, dok, sa imong pagtagad. More power to you and God bless.
Delfin of Tagum
***
Dear Delfin of Tagum,
Unta niadto ka sa imong doktor, aron dili ka maulaw mangutana sa imong sitwasiyon.
Ang kakatol palibot sa imong lubot makahasol gayud ug nakasabot ko nga makaulaw. Gani, lisud gayud ang pagpugong sa imong kaugalingon nga dili ka mangatol niini. Apan, ang problema kay kining pagpangatol makapasamot na hinuon sa imong problema. Dili man hinuon tanan nga kakatol sa lubot matino sa imong doktor ang hinungdan niini, apan, mas maayo gayud nga nisulay ka og pakigkita sa imong doktor niini. Naa man goy mga sakit o pamatasan o diyeta nga makapaaghat sa pagpangatol sa imong lubot.
Daghan man god kaayo ang hinungdan niining pagpangatol sa lubot. Wala man god nimo napiho ug hinganlan ang klase sa kakatol sa imong lubot, susama sa asa dapita sa lubot ang katol - diha ba sa agianan sa hugaw o sa gawas? O unsang orasa mokatol? Gabii ba o sa adlaw? Mao bitaw nga mas maayo gayud unta kung nakigkita ka sa imong doktor aron mahiling og ensakto ning imong lubot.
Karon, ania ang mga hinungdan niining pagpangatol sa lubot.
1. Mga pamatasan sa pagpangasilyas
Kung dili nimo ayuhon og pahid ang hugaw sa imong lubot, ang maskin unsa nga mahabilin maoy hinungdan sa pagpangatol ug pagpanghapdos. Mao nga hinaya paglimpyo ang dapit gamit ang basa-basa nga papel susama sa toilet wipes nga walay baho. Paugha kini gamit ang humok nga tela o di kaha toilet paper.
Kung grabe ang pagkairitar sa imong lubot, mamahimo ka mogamit og dryer sa buhok nga naka-set sa low aron paughon ang imong lubot ug seguraduha nga distansiya ang dryer sa imong lubot kay tingali unya og mapaso na nuon ka unya.
Apan, usa kita magpadayon sa unahan, tungod kay taas-taas pa man ang atong pagahisgutan mahitungod niining imong sitwasiyon, tugoti ako nga ato kini nga padayunon og pagtuki sa mga sunod nga edisyon niining atong patik.
Hangtud sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)