ANG kabalaka, kahingawa ug kahadlok nga gibati karon sa mga ginikanan niadtong mga bata nga naturukan na og Dengvaxia, usa ka anti-dengue vaccine, dili kabayran og sapi. Mismo ang manufacturer niining maong vaccine, Sanofi Pastuer, mibutyag nga dilikado sa mga bata o hamtong nga nabakunahan na nga wala mo-agi og sakit nga dengue. Makapasamot na hinuon kini og mosangpot sa severe dengue.
Nganong dili man sila mabalaka ug mahadlok nga inay nagpabakuna sila sa ilang mga anak isip prevention sa maong balatian, namiligro naman hinuon ang ilang kinabuhi. Mismo ang naghimo sa maong vaccine ang mipahimangno kabahin sa kapeligro sa maong vaccine nga mahatag ngadto sa tawo nga wala pa makasuway ug dengue.
Human moangkon ang manufacturer ning maong kalamboan, mismo ang Department of Health mipahunong og pamakuna. Apan aduna nay mokabat sa 700,00 nga mga menor de edad lukop nasud ang nabakuhan sa unang hugna. Gihimo lang intawon nga experiment ang mga bata. Ang DOH mismo mimando sa ilang mga rural health officers nga pangitaon ang maong mga bata aron mamonitor og maayo ang kalambuan sa ilang panglawas. Kon ikaw ang ginikanan dili ka mabalaka ana?
Dili lang ang Pilipinas maoy miangkat ning maong vaccine. Lakip na usab ang ubang nasud diin sama sa Pilipinas nga taas usab ang mga kaso sa dengue. Wala pay tambal nga nadiskobre batok sa dengue. Ang Dengvaxia vaccine prevention lamang kini. Pero naunsa naman hinuon nga misangpot man sa kabalaka, kahingawa ug kahadlok.
Napalit kining maong vaccine panahon sa administrasyon ni Presidente Noynoy Aquino. Dali ra kuno ang transaksiyon niini. Ambot kinsay nakakuwarta kaha ani. Ang Department of Justice mimando na sa National Bureau of Investigation (NBI) aron pagsuta sa criminal liability sa mga nahilambigit sa transaksiyon. Tulo ka “R” ang angayan himuon aning maong isyo. Una, Recall ang vaccine. Ikaduha, Refund ang nabayad sa gobiyerno ug ikatulo, Rehas sa mga nahilambigit. (bobbygnalzaro@gmail.com)