WAY bayranan ang bata nga nabakunahan og Dengvaxia vaccine ug magsakit og dengue kon malandig sa mga district ug provincial hospital sa lalawigan sa Sugbo.
Si Dr. Rene Catan, pangu sa Provincial Health Office, nipahibawo niini human gikataho nga dunay 10-anyos nga bata sa dakbayan sa Talisay ang giingong nagka-dengue ug nalandig sa tambalanan human mabakunahi og Dengvaxia vaccine niadtong Agusto.
Apan ang Department of Health nihimakak sa mga taho nga nagka-dengue si Jujen Ababon, Grade 5, taga Sityo Kaduldulan, Barangay Lawaan 3, Talisay human mahatagi og Dengvaxia.
Si Bernadas nipasabot nga si Ababon na-dengue kay napaakan og Aedes Aegypti nga lamok ug dili tungod sa Dengvaxia.
Matod niini nga sanglit wala makumpleto sa bata ang tulo ka doses sa Dengvaxia, dili lig-on ang resistensya niini sa upat ka strains sa dengue fever.
“Ang effect ng vaccine will be only be maximized after the third dose,” dugang ni Bernadas.
Sumala ni Catan kon sa 16 ka district ug provincial hospitals malandig ang mga bata nga nabakunahan og Dengvaxia ug nagka-dengue, ma-cover kini sa Philippine Health Insurance (Philhealth) ug dili na pabayron.
“Kon masud sa atong district ug provincial hospitals, ang atong mando gud gamiton ang full benefits sa Philhealth,” dugang niini.
Siya nidugang kon kinahanglan ibalhin og laing pribado nga ospital kon way igong kapabilidad ang ospital sa lalawigan, magpili sila og pacilidad nga moobserbar niini.
Si Catan niangkon nga wala pa silay integrated reporting system sa kasamtangan sa mga bata nga nabakunahan og Dengvaxia.
Tungod nini, maghimo sila og data base sa 159,766 ka mga bata nga nabakunahan sa unang dose sa Dengvaxia dinhi sa Sugbo.
Tumong niini nga mamonitor nila ug mapaubos sa surveillance ang mga bata nga nabakunahan na ug ila kining pangitaon.
Makigtagbo usab siya sa mga municipal health officers karong adlawa ug city health officers sa Lunes, apil ang gikan sa mga siyudad sa Sugbo, Mandaue ug Lapu-Lapu aron dunay protocol nga sundon kon unsay tambal ug pamaagi sa pagtambal sa mga bata nga nabakunahan na og Dengvaxia ug magsakit og dengue.
“So, this is not just a problem of the Department of Health, nor the PHO, nor the CHO, nor the MHO or even the politicians. This is the problem of community, so kinahanglan magtinabangay ta,” dugang ni Catan.