KASAKIT ug kaguol ang nasinati sa katawhan sa Barangay Ermita sa paglubong kang anhing Barangay Kapitan Felicisimo “Imok” Rupinta kagahapon sa hapon.
Nasusama usab kini og political rally tungod sa mga placard nga nagsaway kang Mayor Tomas Osmeña, numero uno nga kritiko ni Rupinta ug pagsinggit sa iyang mga supporter sa ilang pag-agi sa Cebu City Hall.
Usa ka misa sa Our Lady of Mt. Carmel Parish-Recoletos nga gipangulohan ni Fr. Joseph Granada.
Ningtambong ang mga opisyal nga sakop sa Barug Team Rama nga gipangulohan ni kanhi mayor Mike Rama uban nila ni Bise Mayor Edgardo Labella, mga konsehal nga sila si Renato “Junjun” Osmeña, Joel Garganera ug Raymond Alvin Garcia.
Emosyonal ang mga katawhan ug nakita gyud kung unsa kabug-at ug kasakit ang ilang gibati sa pagkawala sa ilang pinalanggang Kapitan.
“Kami tanan nga naa diri, have shown our grieve, our disenchantment at 35 years in the barangay, in the world of street trading and vending...being ambushed. And that is why kami sa Barug Team Rama uban ning katawhan sa Ermita mismo nangita og hustisya kinsa man gyud ang mastermind,” matod ni Rama.
Dako usab og pasalamat ang pamilya ni Rupinta sa suporta sa partido ug sa katawhan sa Ermita.
Mga resista dunay bug-at kaayong mga pulong batok kang Osmeña samtang ang uban nanaghilak sa ilang pagpanamilit sa kapitan.
“Hustisya! Tomas, berdugo ka!,” singgit sa mga supporter ni Rupinta samtang ang ubang nanglabay og mga water bottle sa ilang pag-agi sa entrance sa Cebu City Hall.
Duna pay namalikas kang Osmeña ug kang Winifredo Miro samtang nagwara-wara sa ilang placards nga naa ang mga ngan.
“Tomas, kung ikaw pud ang mamatay, magpaparty ang tibuok Ermita! Wala kay friends,” matod sa usa ka placard.
“Wine Escariote, angay bitayon! Hudas sa Barangay Ermita!,” matod sa laing placard.
Dihang gibuksan ang lungon ni Rupinta sa dayong pagtunod kaniya sa iyang lubnganan sa Queen City Memorial Garden, ang pamilya ug kahigalaan nisinggit og “Ayo-ayo, Kap!” (USJ-R Intern Mary Diane Salasayo, dugang taho ni JOB)