IPADAKOP ug ipapriso ni Mayor Tomas Osmeña ang mga tawo kinsa mag-inom atol sa Sinulog Grand Parade sa Enero sunod tuig.
Si Osmeña gikatakdang moluwat og executive order aron pag-ban sa inom atol sa maong adlaw diin did-an ang mga tawo pag-inom bisan sulod sa mga restaurant-bar (restobar).
“No drinking. People are going to drink one way or the other. If you get caught I will put you in jail. Put you inside the Kaohsiung bus,” bahad ni Osmeña.
Apan posibleng sa South Road Properties (SRP) iyang itugot nga dunay mabaligya nga ilimnon.
Ang mayor gusto nga mopahamtang og disiplina sa mga tawo panahon sa Sinulog sanglit siya nabalaka sa mga terorista nga mohimo og kasamok atol sa maong adlaw.
“My fear is very simple. If the bomb explodes and every body is hubog (drunk)...patay. The damage is more than the bomb itself,” dugang ni Osmeña.
Iyang gipadayag nga andam ug tagana kanunay ang mga terorista sa pagbuhat og kasamok bisan unsa nga oras.
Di nila igsapayan bisan kon kini nagkahulagan sa ilang kinabuhi.
Iyang gihulagway nga ang nahitabo sa mga terorista sa siyudad sa Marawi diin gatusan sa ilang mga kauban ang namatay ug gikasakit sa ilang mga kauban.
Di layo sa kamatuoran nga sila mohimo og kasamok aron makabawos.
Giklaro sa mayor nga wa siya niingon nga moanhi sa Sugbo ang mga terorista apan maayong managana ug mangandam sa tanang higayon sanglit di ma-screen ang tanang tawo.