Mongaya: Isalig sa kabus

SIYUDAD sa Davao – Lahi sa naandang mga programa batok sa kakabus kay dakog papel ang Kilusang Pagbabago, usa ka non-government movement, niining gilusad kagahapon nga Biyaya ng Pagbabago.

Mao kini ang atong nasabtan sa mga pamahayag ni Cabinet Secretary Jun Evasco atol sa press conference sa miaging Biyernes.

Pipila ka mga lider sa Kilusang Pagbabago gikan sa Luzon ug Mindanao ang naabot sa Davao alang sa maong paglusad. Gani, pipila ka gatos kanila ang nag-caravan gikan sa Cagayan de Oro diin sila nidunggo gikan sa Sugbo ug Manila.

Matod pa, papel sa Kilusang Pagbabago ang pag-organisar sa mga tawo isip preparasyon sa ilang pag-angkon ug dayon pagdumala sa implementasyon sa mga proyekto diha sa barangay.

Unsa man kini nga mga pro­yekto?

Atong nasayran nga mga proyekto kini sugod sa 12 ka mga ahensya nga naa ubos sa superbisyon ni CabSec Evasco.

Mao kini ang dose ka mga ahensya: Technical Education Skills Development Authority (TESDA), National Youth Commission (NYC), National Anti-Poverty Commission (NAPC), National Commission for Indigenous Peoples (NCIP), Cooperative Development Authority (CDA), Housing and Urban Development Coordinating Council (HUDCC), National Commission on Muslim Affairs (NCMA), National Food Authority (NFA), Presidential Action Center, Philippine Commission on Women (PCW), Philippine Coconut Authority (PCA), ug ang Presidential Commission on Urban Poor (PCUP).

Alvarez

Sa pagsulat niining lindog, gihugonhugon na nga di maka­tam­bong si Presidente Duterte. Total, kining maong kalihokan gidumala na man sa labing gamhanan sa tanang sakop sa opisyal nga pamilya sa presidente nga si Cabsec Jun Evasco.

Dayon, motambong si Spea­ker Bebot Alvarez.

Akong nasabtan nga paagi kini aron mapakita sa tanan nga walay panagbangi sa PDP-Laban ug ang Kilusang Pagbabago kon nasudnong liderato ang hisgutan.

Ang PDP-Laban mao ang political party sa administrasyon. Sakop niini ang mayoriya sa mga politiko gikan sa Senado ug sa Ubos Balay Balauranan ngadto na sa mga LGU nga nagsuporta ni Presidente Duterte.

Kahinumdoman, nagpala­yo ang mga orihinal nga tigsuporta kang Duterte sa dakong rali sa PDP sa Sugbo. Naabot kining kahimtang dinhi sa kadagkuan sa Davao.

KP

Bisan pa man sa panginguha sa mga lider sa Kilusang Pagbaba­go nga magpabiling usa ka mass movement kini, di malimod nga tan-awon kining maong kalambuan sa anggulo sa politika.

Tinuod, lahi ang pagtan-aw sa uban sa usa ka grassroots movement diin anha moagi ang mga gi­­i­­ngong “Biyaya ng Pagbabago.”

Apan lahi sa una, di awtomatik ang pag-agas sa giingong “biyaya.” Kinahanglang hagu-an kini sa mga sakop sa Kilusang Pagbabago ug ang Office for Participatory Governance (OPG). (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph