GIBALIK na ni Pres. Rodrigo Duterte ang aktibong partisipasyon sa Philippine National Police (PNP) sa kampaniya batok sa ilegal nga drugas. Kini human sa usa ka buwan nga gipahunong sa Presidente ang kapulisan gumikan sa daghan kaayong reklamo kabahin sa extra judicial killings nga gihimo sa mga pulis batok sa mga nahilambigit sa illegal nga drugas. Daghan ang nangamatay ug gidudahan nga gideretso lamang kini og pamatay sa kapulisan. Apan ang mga pulis midepensa nga napugos silag patay kay nanukol ang mga biktima.
Pinasikad sa Memorandum Order No. 17 nga gipirmahan sa Presidente niadtong Martes, iyang gimandoan ang kapulisan nga moabag na sa kampaniya batok sa illegal nga drugas. Apan ang Philippine Drug Enforcement Agency (PDEA) mao gihapon ang lead agency sa kampaniya ug mo-abag lang ang ubang law enforcement agencies. Nunot niini, gikahadlukan nga daghan na usab ang mangamatay kay lagi manukol man.
Apan ang Police Regional Office (PRO 7) nagkanayon nga ning pagbalik sa kapulisan sa eksina sa anti-drug campaign ‘less bloody’ na kuno. Unsa may buot ipasabot ani, wala nay patay? Mahimo kaha na kon pananglitan mosukol ang suspek atol sa raid o buy bust operations? Aw, atong huwaton kon unsa kaha ang lintunganay niini.
Extension
Nunot sa pagpirma sa maong memorandum order, nangayo og laing usa ka tuig nga extension ang Presidente sa iyang kampaniya batok sa illegal nga drugas. Gi-angkon sa Presidente nga pakyas siya sa pagsulbad sa illegal nga drugas gumikan kay lapad ug lawom kini ug daghan ang mga anaa sa katungdanan ang nahilambigit niini.
Sa paglingkod sa Presidente niadtong Hulyo sa miaging tuig, mibahad kini nga sumpoon ang illegal nga drugas sulod sa unom lang ka buwan. Apan pakyas siya. Busa nangayo na usab siya og laing extension. Ambot kon aduna ba gyuy kasulbaran kining problema sa illegal nga drugas nga mikuyanap naman kini og maayo. Dili lang kini masulbad pinaagi sa law enforcement kon dili apil ang komunidad niini. Mao nga magpakabana gyud ta. (bobbygnalzaro@gmail.com)