UGKATON og balik karong Enero ang lawas ni anhing arsobispo Teofilo Camomot gikan sa lubnganan niini sa shrine sud sa dormitory sa Daughters of Saint Therese Mother House sa Barangay Valladolid, siyudad sa Carcar, habagatang Sugbo.
Si Arsobispo Jose Palma nibutyag nga ibalhin ang lawas ni Camomot sa museum nga duol sa gilubngan niini.
Ang lawas ni Camomot unang giugkat niadtong 2009 gikan sa sam-ang publiko sa Carcar.
Siya namahayag nga apeke ang lugar nga nahimutangan sa lubnganan sa anhing arsobispo ug maghuot ang mga tawo nga moduaw.
“Kay ang rason man gud where he is now siot kaayo ba, gamay ang space when people come to visit, halos way lugar didto,” dugang sa arsobispo sa Sugbo.
Matod niya matugaw usab ang kahilom ug kasolemnidad sa dapit labi na kon mag-ampo ang mga madre kon daghang mga tawo ang mobisita sa lubnganan ni Camomot.
Sumala ni Palma ipahibawo nila ang petsa sa pag-ugkat sa lawas kay gi-adjust pa ni Padre Samson Silloriquez, ang postulator nga nagbase sa Roma alang sa kawsa sa pagpabayaw sa pagkasantos ni Camomot, ang skedyul.
Ang Congregation for the Causes of Saints sa Vatican nitugot na sa diocesan process sa artsidyosesis alang sa kawsa sa pagkahimo nga santos ni Camomot.
Si Palma nisaysay nga naa na sa proseso sila si Silloriquez ug Padre Mhar Vincent Balili, vice postulator sa paghimo sa “positiu.”
Ang arsobispo nipasabot ang “positiu” kay ang opisyal nga libro sa kinabuhi ni Camomot.
Nakaduso na sila og mga dokumento kabahin kang Camomot ngadto sa Roma nga moabot og 1,600 ka mga pahina.
Ang “positiu” iduso ngadto sa mga Theologian sa Vatican ug sa Santo Papa ug kon kini motugot, mosaka sa sunod nga proseso, ang pagkahimo nga “venerable” ni Camomot.
Niini, mosunod ang mas mahinungdanon nga proseso diin maghipos ug manguha sila og mga estorya o testimonya sa mga tawo nga naayo o namilagrohan pinaagi sa panginlaba ni Camomot ug kon kini makapasar nga mga milagro, ang anhing arsobispo ideklarar na sa pagka beato. (SCG)