P20M nga ‘smuggled rice’ nasakpan

BUKSAN sa Bureau of Customs (BOC) Port of Cebu ug­mang adlawa ang siyam sa 71 ka container vans nga gii­ngong may pinayuhot nga bugas gikan sa China nga mo­kantidad og P20 milyones.

Matod pa ni BOC Port of Cebu Collector Wivina “Baby” Pumatong, si Customs Commis­sioner Isidro Lapeña moanhi sa Sugbo aron mangulo sa pagbukas sa kargamento sa bugas.

Niingon si Pumatong nga ang importers mideklarar sa mga kargamento nga ceramic tiles apan nakita sa X-ray ug sa pasiunang pakisusi nga bugas ang sulod sa container vans.

Ubos sa balaod, ang mga importers kinahanglang mo­ku­hag importation permit sa National Food Authority (NFA) sa di pa komprahon ang bugas gikan sa laing nasod.

Giila ni Pumatong ang mga consignees nga Seven Myth Marketing sa Ermita, Manila ug Rainbow Horizon Enterprise sa Escolta Street, Binondo, Manila. Samtang ang customs broker mao si Mary Faith Duran Miro nga giingong taga Argao, Cebu.

Ang mga opisyales sa BOC Port of Cebu niingon nga posibleng makiha og economic sabotage ang mga smugglers sa bugas tungod sa kadako sa kantidad sa gipayuhot.

Sumala sa Republic Act (RA) 10845 o Anti-Agricultural Smuggling Act of 2016, mahimong ikihag economic sabotage ang magpayuhot og bugas ug uban pa sa kantidad nga di mominos P10 milyones.

Ang smuggler nga masakpang naghimo niini mahimong hukman nga mabilanggo sa tibuok kinabuhi.

Gidugang ni Pumatong nga walo ka alert orders ang naisyu labot sa pagpayuhot og bugas.

Ang duha ka alert orders nga may 25 ka container vans siya mismo ang mipirma,.

Samtang ang laing unom ka alert orders nga may 46 ka container vans gipirmahan ni Atty. Rico Rey Francis “Koko” Holganza, ang deputy district collector for operations nga OIC-district collector niadtong adlawa.

Ang mga kargamento sa bugas niabot sa Sugbo gikan sa China niadtong Nobyembre 27, 29 ug 30, 2017 ug Disyembre 3, 2017. Gisakay kini sa mga barkong MV Macau Trader, MV Kota Jaya, MV Lobovia, MV AS Ragna ug MV Chattanoga.

Ang mga pinayuhot nga bugas imbargohon sa gobyerno ug pagkahuman ibaligya sa BOC Port of Cebu pinaagi sa public auction. (EOB)