SYUDAD sa Davao – Tungod ba kaha kay istrikto ang pagpatuman sa balaod o di lang gyud abusado ang mga drayber sa taxi dinhi sa syudad nga gihimong showcase ni Presidente Rodrigo Duterte sa panahon sa kampanya hangtod karon.
Atong nabantayan nga maniguro ang mga drayber sa taxi nga makasukli og sakto sa plete sukwahi sa mga drayber dinhi sa Sugbo ug sa Manila nga mokusmod kon sakto lang ang ibayad labi na karong nagkaduol na ang Pasko.
Mosi-aw ra ba kining mga abusado nga drayber karong mga holiday ug inig abot unya sa Sinulog festival diin modagsa sa Sugbo ang liboan ka mga turista ug mga bisita.
Hinuon, wa ko nagpasabot nga abusado na lang ang tanan. Apan kon makasuway ka nga mabiktima og usa, daw mapahid na man gud kini sa uban.
Tingale, panahon na sab nga limpyohan sa mga operator ug kapunongan sa mga taxi drivers ang ilang han-ay sa mga abusado. Bati nga mahimong ngil-ad ang pagtan-aw sa tanan tungod lang sa pipila.
Bisan pa man, malipay ko nga abtik ang atong mga opisyal sa transportasyon sa Sugbo nga moresponde sa mga reklamo sa publiko. Klaro man nato nga kulang ang ilang mga tawo nga mobantay ug dakong tabang kon ang publiko mismo manginlabot sa pagpitol niining mga drayber nga abusado.
Sinulog
Daghan ang malipay niining plano karon sa Syudad sa Sugbo nga mapalayo sa Grand Sinulog Parade ug sa Procession ang mga inom kay dili na kini tugtan sulod sa 300 meter radius gikan sa ruta.
Gani, atong nasayran nga duna gyuy igahin nga lugar sa SRP alang sa mga party aron kadtong gusto og mga ki-at di na diha sa Fuente area, dapit sa Baseline, Mango Square, ug One Mango kini buhaton.
Sa maong paagi, mas makasiguro na kita nga mahimong mas relihiyoso na ang pagpahigayon sa grand parade. Mas makatag na ang mga commercial activities. Ug wala nay hubog nga magdalag gubot sa kalihokan.
Heritage
Gawas pa niini, gibalhin na ngadto sa Plaza Independencia ang mga pagbaligya og mga pagkaon nga kanhi naa sa Fuente Osmeña.
Tungod niini, mas madani na ang mga tawo ngadto sa mga heritage sites sa syudad sama Fort San Pedro. Duol ra kini sa Basilica Minore del Santo Niño ug sa Cebu Metropolitan Cathedral. Duol na sab ang mga museo sa mga turista ug mga balikbayan.
Sa una, daghan ang mahadlok kabahin sa seguridad sa maong dapit. Apan lahi na karon. Kon buot hunahunaon, luwas na kaayo diha sa Plaza Independencia.
Dayon dunay libreng bus gikan sa Plaza Independencia ngadto sa carnival sa SRP.
Kay wala nay mga baligya sa Fuente Osmeña, mangadto na ang mga tawo sa mga silingan nga mga kan-anan. Makabawi kini sa pagdili kanila nga mag-inom. Mas makalaom kita nga dunay malaagan usab ang mga tipong pang-pamilya nga mga manuroy.
(@anol_cebu sa Twitter)