Nalzaro: Abogado ang ihatag

GIBUTYAG sa “kanhi laos nga pulitiko” nga iyang hatagan ug P50,000 ang matag pulis nga makapatay og kriminal. Kini human gibalik ni Presidente Rodrigo Duterte ang aktibong partisipasyon sa kapulisan sa pagpakigbatok sa illegal nga drugas. Matod pa ang maong kantidad dili cash reward ngadto sa mga pulis kon dili legal assistance kini ngadto sa hingtungdang pulis aron aduna siyay magamit kon ikiha siya sa mga kabanay sa iyang ma­patay. Kadto lamang mga pulis nga nakapatay ang hatagan sa maong kantidad kon kini in line sa ilang duty o lehitimong operasyon.

Dili kini ang unang higayon nga ang “anhi laos nga pulitiko” nanghatag og cash reward ngadto sa mga pulis nga nakapatay og mga suspetsadong kriminal atol sa legitimate ope­ration. Niadtong paglingkod niya sa miaging tuig daghan ang iyang nahatagan nga nakapatay og mga tawo nga nahilambigit sa illegal nga drugas.

Apan kining maong lakang kusganong gisaway sa mga opposition councilors kay matod pa nila makadasig kini sa mga pulis nga mopatay na lang og mga kriminal gumikan kay nag-apas sa maong ganti. Daghan ang mga inosente ang mapagan unya niini. Mas motumaw ang daghang pagpamatay.

May saktong punto usab ang taga oposisyon. Pero kon legal assistance kini nganong dili man mokuha lang ang City Government og usa ka private lawyer aron maoy molaban sa pulis nga nakapa­­tay atol sa iyang duty og ang maong kantidad adto ihatag sa maong abogado isip attorney’s fee inay ngadto sa pulis? O ba kaha ang City Hall mokuha og grupo sa mga private lawyers o pool of lawyers aron ang maong mga abogado maoy tahasan sa paglaban sa mga pulis nga maka-atraso. Aron ang maong pulis dili na makakuot sa iyang kaugalingong kuwarta.

Tinuod, kon ang mga pulis nga maka-atraso in line sa ilang official duty magka-problema gyud sa higayon nga sila ipang­kiha na. Kay sila man ang mokuha og mobayad sa ilang kaugalingong abogado. Ilang suweldo ang mapurnada. Ang PNP sab mismo dili man makahatag og abogado busa makalolooy intawon sila. Busa maayo sila hatagan og abogado dili cash assistance. (bobbygnalzaro@gmail.com)