GITANGTANGAN na og lisensiya sa Food and Drug Administration (FDA) pinaagi sa pagkansilar sa certificate of registration ang manufacturer sa Dengvaxia dengue vaccines.
Kini samtang gisugdan usab sa Department of Health sa Central Visayas ang pagpabalik sa mga vial sa Dengvaxia gikan sa city health offices ug municipal health office sa kalungsuran ug mga dakbayan sa Cebu aron iuli ngadto sa Sanofi Pasteur.
Si Dr. Jaime Bernadas, regional director sa DOH 7, nibutyag nga ilang giakusahan ang Sanofi Pasteur nga nakahimo og “mislabeling” nga nigamit sa termino nga “severe dengue cases” sa gipagawas nga advisory bag-ohay nga masinati sa bata kon nabakunahan og Dengvaxia nga wala ma-dengue.
Kini ang hinungdan nga gibakwi sa FDA ang license to operate sa Sanofi Pasteur alang sa pagbaligya og Dengvaxia dinhi sa nasod.
Dinhi sa Sugbo, moabot sa 323,779 ang tinguha nga mabakunahan og Dengvaxia dengue vaccines, apan 49.34 porsyento lang kun 159,766 ang nabakunahan batok sa dengue.
Si Bernadas nitug-an nga human niluwat og kamandoan si Health Secretary Francisco Duque pagpa-recall sa mga Dengvaxia vials, gisugdan na nila ang pagpabalik niini gikan sa mga rural health units sa mga local government unit sa Sugbo, ang uban niini sa sunod tuig na ma-expire.
“Kabalo ta og asa, kabalo tag pila (ang i-recall nga vials),” matod ni Bernadas, apan sa pagkutlo ning balita, wala pay nahatag ang DOH 7 kon pila ka vials ang kuhaunon og balik sa buhatan.
Apil sa kamandoan ang pribadong mga doktor nga namaligya sa maong bakuna sa ilang mga pasyente.
Si Bernadas niangkon nga insakto usab ang gibuhat sa Sanofi nga nag-isyu kini og advisory bahin sa Dengvaxia kay duna kini nakita sa pagtuon apan, ang termino ang ilang gikwestyon tungod kay wa kini giklaro.
Ang “severe” nga klasipikasyon gigamit sa DOH niadtong dekada 90 nga kon itandi kini sa kasamtangan nga klasipikasyon nga gigamit karon sa buhatan mahimo nga maubos kini sa Grade 1 ug Grade 2.
Sa Grade 1, apil sa simtomas kay dunay hilanat ang pasyente, dunay rashes sa panit ug magpositibo sa rapid dengue test.