DI mominos 7,000 ka mga sinako sa gipalusot nga bugas ang nakaplagan sa Bureau of Customs kagahapon sa 14 sa 71 ka mga container van nga gihatod gikan sa China paingon sa Sugbo.
Human madiskobrehi ang gipalusot nga mga sinakong bugas, si Customs Commissioner Isidro Lapeña nimando sa pagkansilar sa importation accreditation sa consignees nga Seven Myth Marketing ug Rainbow Horizons Enterprises nga nagbase sa Manila.
Ang BOC mokansilar usab sa lisensiya sa broker nga nagbase sa Sugbo nga maoy nagtabang sa pagdala sa container vans nga wa gideklarar og sakto paingon sa Sugbo.
Ang consignees ug ang broker ang kasohan usab og paglapas sa Customs Modernization Tariff Act ug Anti-Agricultural Smuggling Act of 2016.
“This is a strong message to smugglers that they cannot continue with this type of business in our country,” matod ni Lapeña atol sa press conference kagahapon.
Base sa ilang nakaplagan, sumala sa commissioner, ang 71 ka container vans nga gikataho dunay sulod nga smuggled rice kay nagbalor og P83 milyones.
Ang mga container van nahiabot sa Sugbo sa managlahi nga mga petsa luwan sa lima ka mga barko.
Ang unang set sa container vans gihatod niadtong Nobiyembre 27, 29 ug 30 samtang ang ikaduhang set kay nahatod niadtong Disyembre 3.
Pag-abot sa container vans sa Sugbo, gideklarar kini nga dunay sulod nga “ceramic tiles.”
Apan dihang gipaubos sa X-ray inspection, nakaplagan nga duna kini sud nga mga sinakong bugas.
Tungod niini, nakahukom ang mga opisyal sa BOC nga dili una i-release ang mga kargamento.
Si Lapeña uban sa mga opisyal sa BOC Port of Cebu ang nangulo sa pag-abli sa 71 ka container vans sa Cebu International Port kagahapon sa alas 3 sa hapon sa Cebu International Port.
Sa pasiunang pagbukas, ila dayon nadiskobrihan ang mga sinako sa Sinandomeng rice sa 14 gikan sa 18 ka container vans, samtang ang upat ka vans kay dunay sulod nga ceramic tiles.
Sa pagkutlo ning balita, ang mga opisyal sa BOC ang padayon nag-abli sa ubang mga container van pagtino sa mga sulod niini.
Si Lapeña nidugang nga ihatag nila sa Department of Social Welfare and Development (DSWD) ang gipalusot nga mga bugas aron magamit isip hinabang ngadto sa siyudad sa Marawi. (JKV, SCG)