BISAN paman sa kakalungan sa abilidad ni Mary June Solitana tungod sa iyang orthopedic impairment, wala kini makapugong kaniya aron makahimo og nagkadaiyang artworks.
Ang 34-anyos nga lumad sa Barangay Zone 6, Santa Barbara, Iloilo gihimong instrumento ang paghimo sa iyang artworks aron mapadayag niya ang iyang gibati.
Gamit ang papel ug lapis, nagsugod siya sa pagdibuho niadtong 12-anyos palang siya.
Manguha ra siya og papel sa iyang mga igsuon aron aduna siyay lingaw.
Si MJ, dili makalakaw, ug anaa lang sa 3 ka tiil ang gitas-on tungod sa iyang kakulangan.
Gamit ang kamot niini ug iyang baba, makahimo na siya og nagkadaiyang artwork sulod lang sa usa ka adlaw.
Dihang namatay ang iyang inahan niadtong 2011, didto siya nagsugod pagsuway og painting gamit ang Titus Pen.
Matod ni MJ nga nahinabi sa Superbalita Cebu nga usa sa hagit niya mao ang pagbutang og emosyon sa iyang artwork.
Aduna’y higayon nga maglagot siya o nasubo ug mao kini ang iyang gigamit aron makahimo og nagkadaiyang maanindot nga mga painting.
Si MJ mao ang ika-11 nga anak sa 12 ka mga managsuon, diin 10 niini ang lalake ug duha sila nga babaye sa iyang kinamanghuran nga igsuon.
Usa si Alex Ordoryo, kinsa usa ka arts teacher sa Iloilo National High School, ang mentor ni MJ karon.
Sa pagkakaron, gitabangan si MJ ni Arnel Murga pinaagi sa Project Akay diin usa kini ka kampanya alang sa mga persons with disabilities (PWDs).
Si Murga usa sa mga representante sa nasod niadtong ASEAN Youth Citizen Journalism Contest sa Singapore niadtong Septiyembye, usa sa nagtabang kang MJ aron ma-promote ang talento niini.
“Sa mga katulad ko na may mga extraordinary na talent, don’t be shy to show up, kung meron man go!,” si MJ nagkanayon.
Usa sa damgo niini mao ang mahimong ilado nga artist dili lang sa nasod, apan lakip sa laing nasod.
Sa umaabot nga Enero, posibleng dalhon ang artworks ni MJ sa Indonesia alang sa usa ka exhibit pinaagi ang ASEAN Foundation.