GIKAN sa ikatulo sa 40th National Milo Marathon Davao Leg niadtong milabay nga tuig, si Arlan Arbois sa Rizal Memorial Colleges (RMC) misikat human mihari sa men's 21k nga titulo sa 41st National Milo Marathon finals nga gihimo bag-ohay lang didto sa Cebu City.
Mitala si Arbois og usa ka oras, 15 minutos ug 21 segundos aron mapildi ang teammate nga Ychon Agustin Jr. (1:18:22) ug Prince Joey Lee (1:18:32) alang sa maong kadaugan.
"Akoang ginahuna-huna nga makaya lang nako ug dili lang masayang akong preparation para sa event kay gusto nako nga mas mo-improve pa ko pagka-athlete," pahayag ni Arbois.
Si Arbois ang midomina sa 10K event hangtud 2015 sa Davao Leg apan ang maong kategorya di kwalipikado sa national finals hinungdan midesisyon siya nga mobalik sa 21k category.
Sa iyang unang pagsulay nakakuha siya og bronze sa 2016 apan karong tuiga mibawi siya sa maong kategorya nga may aktwal nga oras nga 34 minutos ug 50 segundos apan di kini sakto nga maapil sa nasyunal.
Ang Spectrum Runners ang mikuha kaniya ug mi-isponsor sa gasto aron makigtigi sa nasyunal nga kompetisyon.
"First time nako to nga moapil sa nationals, sir, kay gi-isponsoran mi sa Spectrum Runners," dugang ni Arbois.
Sa iyang pagdaug, motibasyon ni Arbois ang iyang pamilya ug coaches lakip na iyang pangandoy nga mahimong sikat nga 'runner'.
"Gusto nako mahimog ilado kay para ma-inspire nako ang mga bata," panapos ni Arbios. (ABM)